د سالنګ لوی لارې د ۸۰ کیلومټره سړک د بیارغونې چارې پرون «چهارشنبه- د چنګاښ ۲۱مه» د ریاستالوزرا اقتصادي مرستیال عبدالغني برادر د ټولګټو وزارت سرپرست محمدعیسی ثاني او د بغلان او پروان ولایتونو محلي مسوولانو په شتون کې پیل شوې.
د یاد سړک د رغونې چارو د پرانېستلو پر مهال عبدالغني برادر وویل چې د قوشتېپې کانال وروسته دا په هېواد کې دویمه ستره ملي او اقتصادي پروژه ده چې په بشپړېدو سره به یې له شمال څخه سوېل ته د تګراتګ او سوداګریزو توکو لېږد برخه کې اسانتیاوې رامنځته کړي.
د سلاموطندار پښتو فېسبوکپاڼه وڅارئ
د ریاستالوزرا اقتصادي مرستیال زیاته کړه چې سرپرست حکومت د پروژو بشپړېدو ته چمتو دی او ژمنه یې وکړه چې دې برخه کې قراردادي شرکتونو سره به هر راز مرسته وکړي.
د سالنګ لویه لاره د پروان له جبلالسراج ولسوالي د بغلان تر خنجان ولسوالي غځېدلې چې د دوو کلونو په موده کې به د دوو خصوصي شرکتونو له لوري بیاورغول شي.
تراوسه د یادې پروژې ټولییز لګښت نه دی په ډاګه شوی. د ټولګټو وزارت سرپرست بیا وايي چې د سالنګ لویې لارې د اسفالت لګښت له یادې لویې لارې د ټولو شویو عوایدو څخه ورکول کېږي.
د پروان د امنیې قومندان عزیزالله عمر وايي چې د یادې پروژې پلېکېدو لپاره ۱۰۰سلنه امنیت نیول شوی دی. هغه اړوند قراردادي شرکتونو او مسافرو ته ډاډ ورکوي چې کولای شي پر دې لاره شپه او ورځ تګراتګ وکړي.
دا په داسې مهال دی چې له تېرو اوو کلونو راهیسې د سالنګ لویې لارې د دواړو غاړو اوسېدونکو او مسافرو د یادې لارې له خرابوالي شکایت درلود.
د سالنګ لویه لاره د هېواد نهه شمالي ولایتونه او څلور ستر سوداګریز بندرونه له پلازمېنې کابل سره نښلوي.