د افغانستان د هوا پېژندنې ریاست نن (د وري نهمه، د چهارشنبې ورځ) په یوه خبرپاڼه کې لیکلي چې سبا به په ۱۳ ولایتونو کې سخته واوره او بارانونه وشي چې له کبله به یې سېلابونه هم راشي.
د سلاموطندار پښتو فېسبوکپاڼه وڅارئ
دغه ریاست ویلي چې د سالنګونو په ګډون به په کابل، پروان، پنجشېر، کاپیسا، بغلان، بدخشان، تخار، نورستان، کونړ، لغمان، ننګرهار، سمنګان او بامیان ولایتونو کې سخته واوره او بارانونه وشي.
د هوا پېژندنې ریاست زیاته کړې چې د هېواد په بېلابېلو برخو کې د باران اورېدو کچه له ۱۵ تر ۳۰ ملي مترو او د واورې هم له ۲۰ تر ۳۰ سانتي مترو پورې اټکل شوې ده.
دا په داسې حال کې ده چې د وروستیو ورځو پر مهال د هېواد په بېلابېلو برخو کې بارانونه او واوره د ویجاړوونکو سېلابونو لامل شوې ده. دغو سېلابونو خلکو ته د مالي زیانونو تر څنګ، ځاني زیانونه هم اړولي دي.