د بېپولې خبریالانو نړیوال سازمان نن د یوې خبرپاڼې په خپرولو سره ویلي چې په افغانستان کې د خبریالانو خپلسري نیول زیات شوي.
د خبرپاڼې پر بنسټ، د تېرې یوې میاشتې پرمهال په ټول افغانستان کې ۱۲ خبریالان نیول شوي او زنداني شوي دي.
د بېپولې خبریالانو سازمان خبرپاڼه کې ویل شوي، تراوسه د هېڅ خبریال دوسیه چې د بېلابېلو تورونو له امله نیول شوي، د رسنیو د سرغړونې کمېسیون له لورې نهده ارزول شوې چې دغه اقدام د رسنیو د قانون خلاف دی.
سلاموطندار پر ټویټر هم وڅارئ
د خبریالانو د ملاتړ دغه نړیوال سازمان د خبریالانو خپلسري نیول غندلي او له اسلامي امارت څخه یې غوښتي چې له خبریالانو سره خپلې کړې ژمنې عملي او د رسنیو قانون ته درناوی وکړي.
د بېپولې خبریالانو نړیوال سازمان خبرپاڼه کې ویلي: «اسلامي امارت د رسنیو د سرغړونو کمېسیون او معلوماتو ته د لاسرسي کمېسیون جوړ کړی او د ټولیزو رسنیو د قانون له مخې هېڅ بنسټ اجازه نلري چې د رسنیو د سرغړونو د کمېسیون له ارزونې او نظر پرته د دوسیو په اړه عدلي بنسټونو ته د هغې د لېږلو له پرېکړې مخکې خبریالان ونیسي.»
د سلاموطندار پښتو فېسبوکپاڼه وڅارئ
دغه سازمان زیاته کړې، د رسنیو د سرغړونو د کمېسیون جوړېدو تراوسه د خبریالانو په نیولو او بندي کولو کوم اغېز نه دی کړی.
د یادونې ده چې له دې مخکې افغانستان کې د ملګرو ملتونو سازمان مرستندویه پلاوي (یوناما) هم د خبریالانو پر وړاندې د تاوتریخوالي زیاتېدو په اړه اندېښنه څرګنده کړې وه.
