په کاپيسا کې د پژواک خبري اژانس محلي خبريال عبدالحنان محمدي چې له څلورو مياشتو راهيسې د اسلامي امارت د استخباراتو په زندان کې و، نن خوشې شوی دی.
د محمدي د کورنۍ غړیو سلاموطندار ته د اسلامي امارت له بنده د نوموړي خوشېکېدل تایید کړي او ویلي یې دي چې محمد نن (جمعه د تلې ۸مه) له غرمې وروسته د اسلامي امارت له بند څخه ازاد شوی او خپلې کورنۍ ته ستون شوی دی.
ویل کېږي چې محمدي څلور میاشتې مخکې په کاپیسا کې د اسلامي امارت د استخباراتو لهخوا زنداني او وروسته بیا د کابل یوه زندان ته لېږل شوی و.
په وروستیو میاشتو کې د محمدي کورنۍ د نوموړي د روغتیا په اړه اندېښنمنه وه او په وار وار له اسلامي امارت د هغه د خوشې کولو غوښتنه کړې وه.
اسلامي امارت تراوسه د محمدي د زنداني کولو په اړه حزییات نه دي ورکړي.
دا په داسې مهال ده چې د اسلامي امارت د ویاند مرستیال بلال کریمي په زندان کې د محمدي د ځورونې د ادعاوو په اړه ویلي و چې اسلامي امارت د بیان ازادۍ ته ژمنه ده او هېڅ خبریال نه دی بندي شوی.
