د نیوزیلنډ کرېکټ ملي لوبډلې نن د پاکستان په کوربهتوب د دغه هېواد د کرېکټ له ملي لوبډلې سره د شل اووره سیالیو لوبلړۍ پیلوي.
ټاکل شوې چې یاده لوبه نن پنجشنبه، اپرېل ۱۸مه د پاکستان د «راولپنډۍ په کرېکټ لوبغالي» کې ترسره شي.
د سلاموطندار پښتو فېسبوکپاڼه وڅارئ
د پاکستان په کوربهتوب د پنځو شل اووره سیالیو کېدونکې دغه لړۍ به د پاکستان په راولپنډۍ او لاهور ښارونو کې ترسره شي.
د یادې شل اووره لوبلړۍ لومړۍ درې لوبې په راولپنډۍ او وروستۍ دوه سیالي به په لاهور ښار کې وشي. دواړو لوبډلو لا له وړاندې دې لوبلړۍ ته د لوبغاړو نوملړ اعلان کړی چې نیوزیلنډ دې سیالیو ته تر ډېره ځوان لوبغاړو ته د لوبېدو چانس ورکړی دی.
د نیوزیلنډ کرېکټ ملي لوبډلې ډېری لوبغاړي په ایپياېل لیګ کې پر لوبو بوخت دي او له همدې امله نویو لوبغاړو ته لوبډله کې ځای ورکړل شوی دی.
پاکستان بیا د ځوانو لوبغاړو ترڅنګ محمدعامیر چې له کرېکټ یې د مخه ښه اوازې خپرې شوې وې، یو ځل بیا لوبډلې ته راوستل شوی دی.
عماد وسیم هم چې له ډېر وخت راهیسې په لوبډله کې د نه لوبېدو له امله پر کرېکټ بورډ نیوکې کولې، د نیوزیلنډ پروړاندې لوبډله کې اخیستل شوی دی.
یوشمېر نور ځوان لوبغاړي چې د دغه هېواد په کورني کرېکټ او سوپر لیګ کې ښه لوبېدلي، د لوبډلې برخه دي.