د نیوزیلنډ کرېکټ ملي لوبډله نن د یو ورځنیو سیالیو نړیوال جام کې په یوې برخلیک ټاکوونکې لوبه کې د سریلانکا کرېکټ ملي لوبډلې سره لوبه کوي.
ټاکل شوې چې دغه لوبه نن پنجشنبه د نومبر نهمه د هند په «ام چېناسوامي کرېکټ لوبغالي» کې ترسره شي.
د سلاموطندار پښتو فېسبوکپاڼه وڅارئ
د نیوزیلنډ کرېکټ ملي لوبډله د روان یو ورځنیو سیالیو نړیوال جام نیمه پایلوبو ته د وتلو لپاره باید نن د سریلانکا کرېکټ ملي لوبډله له مخې پورته کړي. نیوزیلنډ، پاکستان او افغانستان لا هم نیمه پایلوبې ته د تلو لپاره چانس لري.
که نیوزیلنډ نن د سریلانکا پر وړاندې له ماتې سره مخ کېږي، پاکستان باید د انګلستان پر وړاندې خپله وروستۍ سیالي کې بریا خپله کړي، څو نیمه پایلوبې ته لاړ شي.
افغانستان بیا سوېلي افریقا سره لوبه لري چې د نیوزیلنډ او پاکستان ماتو سره باید دې لوبډلې ته ستره ماته ورکړي چې نیمه پایلوبې ته ووځي.
نیوزیلنډ د غوره رنزرېټ په لرلو سره څلورم، پاکستان پنځم او افغانستان شپږم ځای کې شتون لري.
بلخوا د سریلانکا لوبډله به هڅه کوي چې نیوزیلنډ ته دې لوبه کې ماته ورکړي او چمپینز ټرافي ته لاره ومومي. سریلانکا دا مهال د جدول نهم ځای کې شتون لري. له دوو بریاوو او شپږو ماتو څخه اته امتیازه لري.
د یادو سیالیو په لړ کې بېګاه انګلستان لوبډلې نیدرلنډز ته ماته ورکړه. دا په روان جام کې د انګلستان دویمه بریا وه.