د ټولګټو وزارت مسوولان وايي چې تېر لمریز کال کې د کابل ـ جلالاباد لویې لارې د بیارغولو په ګډون د ۴۶۸ پرمختیايي پروژو چارې بشپړې شوي دي.
دغه څرګندونې د یاد وزارت مسوولانو نن دوشنبه، زمري ۲۲مه کابل کې د امارتي ادارو د یو کلنو لاسته راوړنو د تشرېح پروګرام کې کړې دي.
د سلاموطندار پښتو فېسبوکپاڼه وڅارئ
دوی همداراز دې پروګرام کې وویل، د دغو پروژو له ډلې د ۸۵ هغو چارې د خصوصي سکتور له لوري تطبیق شوي دي.
د ټولګټو چارو وزارت تخنیکي مرستیال عبدالکریم فاتح وویل: «د پروژو د ساتنې په موخه په تېر یوه کال کې په ټول هېواد کې ۴۶۸ پروژې پلې شوې چې ۸۵ یې، د خصوصي سکټور لهخوا بشپړې شوي او ۲۴ نورې تر کار لاندې دي. سربېره پر دې، ۱,۶۹۸ کیلومتره سفالټ سړکونه ترمیم او بیارغول شوي دي.»
د مسوولانو په وینا، تېر يوه کال کې د هېواد په کچه د پراختیایي او بنسټیزو پروژو د تطبیق له لارې څه باندې ۱۵ زره کسانو ته په مستقیم ډول د کار زمینه هم برابره شوې.
د ټولګټو وزارت مسوولان زیاتوي چې تېر کال د شاوخوا زر کیلومتره سړک د بیارغولو تړون لاسلیک شوی او د روان لمریز کال پرمهال به بېلابېلو برخو کې د کابل- کندهار لویې لارې د بیارغولو چارې هم تطبیق شي.
د ټولګټو چارو وزارت ویاند محمد اشرف حقشناس وویل: «د کابل-کندهار لویه لاره د سړک جوړونې او ساختماني شرکت سره په ۱۳ برخو کې قرارداد شوي او کار یې روان دی او د سالنګ لویه لاره په درېوو برخو ویشل شوې او کار یې روان دی.»
د ټولګټو چارو وزارت مسوولان زیاتوي چې د روان لمریز کال پرمهال لویولارو کې د ټرافیکي نښو نصبول، د سړکونو د تخریب مخنیوي په موخه ګمرکونو کې د لوړ تُناژ د ۱۷ تلو فعالول او د باروړونکو موټرو د وزن کنټرولول د دغه وزارت له نورو پلي کېدونکو پروګرامونو څخه دي.