د ماشومانو د خوندیتوب سازمان (Save The Children) اجراییوي رییس ډېوېډ رایټ پرون یکشنبه د مرغومې ۲۵مه ویلي، د افغانستان په ځینو ولایتونو کې د خپلو فعالیتونو یوه برخه بېرته له سره پیلوي.
نوموړي زیاته کړې چې کار ته د ښځو د ورستنېدو تضمین ورکړل شوی او په هغو ولایتونو کې به بېرته خپل فعالیتونه پیل کړي چې ښځې دوی سره کار ته پرېښودل کېږي.
نوموړي ویلي: «د اسلامي امارت د اقتصاد وزارت له لوري مرستندویه موسسو کې د ښځو پر کار د بندیز له امله د ماشومانو د خوندیتوب سازمان افغانستان کې خپل فعالیتونه ځنډوي.»
ډېوېډ رایټ ټينګار کړی چې په خوندي او اغېزمنه توګه د خدمتونو وړاندې کولو لپاره دغه سازمان ته د ښځینه کارکوونکو ورستنېدل اړین دي او یاد سازمان نشي کولای چې خپلو فعالیتونو ته دوام ورکړي.
د نوموړي په وینا، افغانستان کې د ماشومانو د خوندیتوب سازمان د کاري ځواک ۵۰سلنه برخه مېرمنې جوړوي چې ښځو ته د غوره خدمتونو د رسولو په موخه د دوی شتون اړین دی.
ډېوېډ رایټ زیاته کړې چې افغانستان کې د ماشومانو د خوندیتوب سازمان نوي فعالیتونه چې د دوی د بشپړ کار یوه کوچنۍ برخه جوړوي، پر روغتیا، تغذیې او نورو خدمتونو به راڅرخي.
سلاموطندار پر ټویټر هم وڅارئ
د ماشومانو د خوندیتوب سازمان د اسلامي امارت له لوري په نادولتي کورنیو او بهرنیو موسسو کې د ښځو د کاربندیز په غبرګون کې خپل فعالیتونه ځنډولي دي.