Category: امنیت

د دفاع وزارت ویلي، د پاکستان د تېرې شپې بریدونو په غبرګون کې یې د خیبرپښتونخوا ایالت کوهاټ سیمه کې د پاکستاني پوځیانو ستراتيژیک نظامي مراکز او تأسیسات په نښه کړي. دغو بریدونو کې د کلا نظامي تأسیسات، د قومندې مرکز، ډيپوګانې او د عسکرو د هستوګنې ځایونه لمنځه وړل شوي چې درانه ځالي او مالي زیانونه یې اړولي دي.

د اسلامي امارت ویاند ذبیح‌الله مجاهد وایي، د تېرو جنایتونو په دوام پاکستان یوځل بیا تېره شپه په کابل، کندهار، پکتیا، پکتیکا او ځینو نورو سیمو بمبارد وکړ. هغه ویلي، په ځینو ځایونو کې ملکي کورونه په نښه شوي چې ښځې او ماشومان یې شهیدان کړي او ځينو سیمو کې یې تشې دښتې او خالي ځایونه په نښه کړي.

اسلامي امارت د ویاند مرستیال وايي، خوست کې د پاکستان برید پرمهال د يوې کورنۍ ۴ غړي شهيدان او ۳ تنه نور ټپيان شوي.

حمدالله فطرت نن پنجشنبه د حوت ۲۱ / مارچ ۱۲ پر اېکسپاڼه لیکلي چې د خوست د عليشېرو ـ تريزيو ولسوالۍ اړوند د «صدقو» کلي د «بدرګې ګورګورې» سيمه کې تېره شپه شاوخوا څلور بجې د پاکستاني پوځ له لوري د عامو خلکو پر کورونو او د کوچيانو پر خېمو د توپونو او هاوانونو بريدونه شوي.

د ماشومانو د ژغورنې نړیوال بنسټ Save the Children ویلي، د افغانستان او پاکستان ترمنځ د نښتو زیاتېدو له امله، د افغانستان په ختیځ کې شاوخوا ۶۸ زره ماشومان له خپلو کورونو بې‌ځایه شوي.

دغه بنسټ یوه تازه راپور کې ویلي، د سلګونو ټولګیو او لنډمهالو زده‌کړیزو مرکزونو د تړل کېدو په دلیل، له ۸ زرو څخه ډېر هغه ماشومان چې د ژغورنې نړیوال بنسټ او د شریکانو له لوري یې ملاتړ کېده، دامهال له ښوونځي پاتې دي.