د افغانستان بهرنیو چارو وزارت سرپرست امیرخان متقي د یوه پلاوي په مشري د ترکمنستان په بلنه دغه هېواد ته تللی دی.
د بهرنیو چارو وزارت د ویاند مرستیال حافظ ضیااحمد تکل نن یکشنبه، کب پنځمه پر اېکسپاڼه لیکلي چې متقي او ورسره مل پلاوي د ترکمنستان د بهرنیو چارو وزیر رشید مُردوف په بلنه یاد هېواد ته سفر کړی دی.
د سلاموطندار پښتو فېسبوکپاڼه وڅارئ
د نوموړي په وینا، امیرخان متقي به د دغه سفر پر مهال له خپل ترکمنستاني سیال سره د لیدني ترڅنګ د دوه اړخیزو مسایلو په اړه خبرې وکړي.
هغه لیکلي: «د بهرنيو چارو وزير محترم مولوي امير خان متقي د يوه پلاوي په مشرۍ د ترکمنستان د بهرنيو چارو وزير ښاغلي رشيد مُردوف په بلنه پر گڼو دوو اړخيزو مسايلو د خبرو اترو په موخه هغه هېواد ته په رسمي سفر روان شو.»
په ورته مهال ترکمنستان ته تللي افغان پلاوي کې د بهرنیو چارو وزارت سرپرست بېره، د کانونو او پټرولیم وزارت، د اوسپنې پټلۍ ادارې او برښنا شرکت چارواکي هم ګډون لري.