د افغانستان د کرېکټ ملي لوبډله نن چهارشنبه د جولای پنځمه د بنګلدېش کرېکټ ملي لوبډلې پر وړاندې د درېوو یو ورځنیو سیالیو لوبلړۍ پیلوي.
ټاکل شوې چې دغه سیالي نن ۱۲:۳۰ بجې د بنګلدېش د چېټوګرام په ظهور احمد چوهدري نړیوال لوبغالي کې پیل شي.
د سلاموطندار پښتو فېسبوکپاڼه وڅارئ
بنګلدېش لوبډلې تېره میاشت په یوازینۍ نړیواله ټسټ لوبه کې افغانستان ته ستره ماته ورکړه او د یو ورځنیو لوبو پیلېدونکي لوبلړۍ کې چانس چې خپل غچ واخلي.
په ورته مهال د افغانستان کرېکټ ملي لوبډلې لپاره ښه خبر دا دی چې ستوری لوبغاړی راشدخان هم بېرته ملي لوبډلې ته ستون شوی دی.
بلخوا د بنګلدېش کرېکټ ملي لوبډلې د افغانستان پر وړاندې لوبو ته خپل پیاوړی الرونډر شکېبالحسن هم بېرته لوبډلې ته راوستی دی.
د بنګلدېش او فغانستان کرېکټ ملي لوبډلو ترمنځ په وروستیو پنځو یو ورځنیو نړیوالو لوبو کې افغانستان یوازې یو وار بنګلدېش ته ماته ورکړې او پاتې څلور سیالي یې بنګلدېش ګټلي دي.
د افغانستان کرېکټ ملي لوبډلې په خپلو وروستیو پنځو یو ورځنیو لوبو کې یوازې یوه لوبه ګټلې، درې یې بایللي او یوه یې د باران له امله لغوه اعلان شوې ده.
بنګالۍ لوبډلې بیا وروستیو پنځو یو ورځنیو نړیوالو سیالیو کې درې ګټلي او دوه یې د باران له کبله په مساوي توګه پای ته رسېدلې دي.