د پکتیکا محلي مسوولان وايي چې د دغه ولایت نکې ولسوالي ته د ۲۲ میلیونه افغانیو په لګښت د اداري ودانۍ د جوړېدو چارې یې پیل کړې دي.
د پکتیکا د اطلاعاتو او فرهنګ رییس امين حذيفه سلاموطندار ته ویلي چې یادې ولسوالي ته د ودانۍ چارو جوړېدو منظوري د کورنیو چارو وزارت لهخوا ورکړل شوې او رغنیزې چارې یې پیل شوې دي.
د سلاموطندار پښتو فېسبوکپاڼه وڅارئ
د نوموړي په وینا، په نکې ولسوالي کې دا لومړۍ حکومتي ودانۍ ده چې په پاخه او معیاري بڼه جوړېږي. له دې وړاندې دغه ولسوالي کې هېڅ حکومتي ودانۍ په معیاري او اساس ډول نهوه جوړه شوې.
د پکتیکا د اطلاعاتو او فرهنګ رییس امين حذيفه زیاته کړه چې د يادې ودانۍ رغنیزې چارې به په راتلونکو شپږو مياشتو کې بشپړې شي چې ورسره به خلکو ته د خدمتونو وړاندې کولو برخه کې اسانتياوې رامنځته کړي.
څه موده وړاندې د پکتيکا والي فيصالله جمال له سلاموطندار سره په يوه مرکه کې ويلي و، د ياد ولايت له څلورويشت ولسواليو له ډلې دولس هغه یې ودانۍ نهلري، خو ژمنه يې کړې وه چې هر څه ژر به ولسواليو ته ودانی جوړوي.