د فوټبال نړیوال فدراسیون یا فیفا اعلان کړی چې د ۲۰۲۶کال فوټبال نړیوال جام سیالیو کې به د مصنوعي ځیرکتیا (AI) او پرمختللې ډیجیټلي ټکنالوژي وکارول شي، څو د لوبو کیفیت، د لوبڅارۍ د پرېکړو کرهوالی او د مینهوالو تجربه لاښه شي.
د فیفا د معلوماتو له مخې، په دې سیالیو کې به د لوبغاړو مصنوعي ځیرکتیايي اواتارونه، د حسګرلرونکي توپ او د روزونکو لپاره ډیجیټلي مرستیالان وکارول شي.
ځیرک توپونه د لا کره لوبڅارۍ لپاره!
د اډیډاس له لوري جوړ شوی نوی رسمي توپ «تریوندا» د ۵۰۰ هرتزه حرکتي حسګر (Motion Sensor) سره سمبال دی چې په یوه ثانیه کې ۵۰۰ ځله د توپ معلومات ثبتوي.
دغه ټکنالوژي لوبڅارانو ته اجازه ورکوي چې د توپ د وهلو دقیق وخت وپېژني، کوم چې د افسایډ او نورو جنجالي صحنو په ارزونه کې مهم رول لري. همدارنګه دا سیستم د (Handball) او پنالټۍ اړوند پرېکړو کې هم مرسته کوي.
د لوبغاړو درېبعدي اواتارونه
د فیفا مشر جیاني اینفانتینو ویلي، د نړیوال جام ټولو ۱,۲۴۸ لوبغاړو لپاره به ډیجیټلي اواتارونه جوړ شي.
د هر لوبغاړي د بدن یو ثانیهییز سکین به اخیستل کېږي او له هغې وروسته به یې یو ډېر دقیق درېبعدي ماډل جوړېږي. دا ماډلونه به لوبڅارانو سره مرسته وکړي چې د چټکو او پېچلو صحنو ارزونه په لا ښه ډول وکړي.
دغه نوې ټکنالوژي د فیفا د نیمهاتومات افسایډ سیسټم بشپړوي، کوم چې د لوبغالي د کامرو له لارې د توپ او لوبغاړو موقعیت په یوه ثانیه کې ۵۰ ځله ثبتوي.
د مینهوالو لپاره نوې لید تجربه
فیفا همدارنګه د «د لوبڅار لید» په نوم نوې ټکنالوژي معرفي کړې چې د مصنوعي ځیرکتیا په مرسته به د لوبې انځورونه داسې وړاندې کوي، لکه لیدونکي چې د لوبغالي په منځ کې د لوبغاړو ترڅنګ ولاړ وي.
تمه ده چې دغه نوښت به د تلویزیوني خپرونو او په لوبغالي کې د ناستو مینهوالو تجربه نوره هم جذابه کړي.
Football AI Pro؛ د روزونکو لپاره ځیرک مرستیال
فیفا د Football AI Pro په نوم یو نوی ځیرک سیسټم هم معرفي کړی چې د نړیوال جام ټولو ۴۸ ګډونوالو لوبډلو ته به تحلیلي خدمات وړاندې کوي.
دغه مصنوعي ځیرکتیايي مرستیال به د لوبو تخنیکي او تاکتیکي تحلیلونه، د لوبغاړو د فعالیت ارزونه او د سیالانو په اړه مهم معلومات چمتو کړي.
سیسټم به د لوبو معلومات په متنونو، ویډیویي راپورونو او انځوریزو ګرافونو بدلوي، څو روزونکي او د لوبډلو مسوولان پرېکړې په لا ښه ډول وکړي.
فیفا باور لري چې دغه نوې ټکنالوژۍ به د ۲۰۲۶نړیوال جام د فوټبال په تاریخ کې له تر ټولو پرمختللو او ټکنالوژۍ محورو سیالیو څخه وګرځوي.