د کار او ټولنیزو چارو وزارت ویاند سمیعالله ابراهیمي وايي چې تېر کال هېواد کې له زیان سره د مخ ماشومانو نږدې ۱۵۰۰۰ قضیو ته رسېدنه شوې.
هغه نن شنبه حمل ۱۵ / اپرېل ۴ یوه ویډیويي کلپ کې ویلي، د کار او ټولنیزو چارو وزارت د ماشوم ساتنې ریاست په تېر ۱۴۰۴ کال کې د پراخو ملاتړیزو پروګرامونو په پلي کولو سره، د زرګونو ماشومانو قضیې تعقیب کړي.
هغه ویلي چې د ماشومانو او د هغوی کورنیو ته یې د عامه پوهاوي کولو په شمول، د نوو نوښتونو په پیلولو سره، د ماشومانو د حقوقو په تأمین او د وضعیت په ښهوالي کې کوټلي ګامونه پورته کړي.
ده وویل، تېر کال کې د ماشوم ساتنې ریاست توانېدلی چې د ملاتړو سیستمونو په پیاوړتیا او د ټولنیزو خدماتو په پراخولو، د ماشومانو په ساتنه کې اغېزمن رول لوبولی او ټولټال په ۲۳ بېلابېلو کټګوریو کې یې ۱۴۵۹۴ له زیان سره د مخ ماشومانو قضیې تعقیب او حل کړي.
همدارنګه د کار او ټولنیزو چارو وزارت تېر کال ماشومانو او د هغوی کورنیو ته د عامه پوهاوي پروګرام له لارې، ۴۰۴۲۰۷ تنه ماشومانو او د هغوی د کورنیو غړو ته د ماشوم د حقوقو، د چاودېدونکو توکو له خطرونو د ځان ساتلو، د چاپېریال ساتنې او نورو مهمو موضوعاتو په اړه پوهاوی ورکړی دی.
سمیعالله ابراهیمي زیاته کړې چې دامهال د هېواد په ۲۰۴ ولسوالیو کې د ماشومانو د ساتنې کمېټې فعالې او په منظم ډول د ماشومانو ستونزو ته رسیدنه کوي.