پر غزې د اسراییلو په تازه هوايي بريدونو کې لږترلږه ۲۳ فلسطينيانو خپل ژوند له لاسه ورکړی دی. د طبي سرچينو په وينا، دا د اوربند له پيل راهيسې يو له تر ټولو مرګونو ورځو څخه ګڼل کېږي.
الجزيرې شبکې (سلواغې ۱۵مه / فبرورۍ څلورمه) راپور ورکړی چې د وژل شويو کسانو په منځ کې ماشومان هم شامل دي.
د راپور له مخې، اسراییلي ځواکونو د غزې ښار د «التفاح» او «الزيتون» سيمې، همداراز د خانيونس په سوېل کې د بېځايه شويو کسانو خېمې او د المواصي سيمه بمبار کړي دي.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
د فلسطين د سره صلیب ټولنې ويلي چې په دغو بريدونو کې يو مرستندویه کارکوونکی هم وژل شوی دی. دا بريدونه په داسې حال کې کېږي چې د امريکا په منځګړيتوب اوربند لاهم په رسمي ډول نافذ دی.
د اسراییلو پوځ ويلي چې ياد بريدونه وروسته له هغه شوي چې د دوی يو افسر د غزې په شمال کې سخت ټپي شوی و او زياته کړې يې ده چې دا د «معمولو عملياتي فعاليتونو» برخه ده.
د راپورونو له مخې، د اوربند له پيل راهيسې تراوسه له ۵۲۰ څخه زيات فلسطينيان د اسراییلو په بريدونو کې وژل شوي او د ۲۰۲۳کال د اکتوبر له پيل راهيسې د جګړې ټوليز تلفات له ۷۱زرو کسانو اوښتي دي.