د چین د بهرنیو چارو وزارت ویلي، امریکا باید د ونزویلا ولسمشر نیکولاس مادورو او د هغه مېرمن سمدستي خوشې کړي او د هغوی نیول یې له نړیوالو قوانینو څخه ښکاره سرغړونه بللې ده.
د چین د بهرنیو چارو وزارت په یوه رسمي بیان کې ویلي: «چین د امریکا لهخوا د ولسمشر نیکولاس مادورو او د هغه د مېرمنې په زور نیول او له هېواده بهر انتقالول، په جدي توګه د اندېښنې وړ بولي.»
بیان زیاتوي چې د امریکا دغه اقدام د نړیوالو قوانینو، د نړیوالو اړیکو له بنسټیزو اصولو او د ملګروملتونو د منشور له موخو او اصولو سره په ټکر کې دی.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
چین له امریکا غوښتي چې د مادورو او د هغه د مېرمنې د شخصي خوندیتوب ډاډ ورکړي او هغوی بېله ځنډه خوشې کړي.
د چین حکومت همدارنګه پر واشنګټن غږ کړی چې د ونزویلا د حکومت د نسکورولو هڅې ودروي او شته ستونزې د خبرو او ډیپلوماټیکو لارو حل کړي.
دا څرګندونې په داسې حال کې کېږي چې د امریکا د وروستیو اقداماتو په تړاو د نړیوالو غبرګونونو لړۍ روانه ده او د سیمې سیاسي وضعیت لا ترینګلی شوی دی.