د هلمند امنيه قومنداني له جنايي جرمونو سره د مبارزې مدیریت مسوولانو د تېرو درېیوو مياشتو پرمهال پنځوس کسان د بېلابېلو جرمونو په تور نيولي دي.
د هلمند د اطلاعاتو او فرهنګ ریاست مرستیال، مولوي شېرمحمد وحدت، سلاموطندار وويل: «د نيول شویو کسانو سره ۳۲ ميله تفنګچې، ۴ ميله کلاشينکوفونه، ۴ ميله کمرشکنونه، ۴ دانې لاسي بمونه، ۱ دانه دوربین، ۱۰ دانې چړې، ۱۳ دانې چاقوګان، ۲ دانې پنج بوکسونه او يو شمېر نور هغه سامان آلات هم نیول سوي دي چې په جنايي جرمونو کې ورڅخه استفاده شوې ده.»
هغه زياته کړه، «نيول شوي کسان د غلا، قتل، جنګ او نورو جنايي جرمونو په تړاو تورن دي ، او تر دوسیو بشپړولو وروسته اړونده عدلي او قضايي ارګانونو ته معرفي شوي دي.»
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
د لښکرګاه اوسېدونکي احمدالله، وویل: «موږ له دې اقدام څخه خوشحاله يو، ځکه چې خلک اوس ځان خوندي احساسوي او جرمونه کمېږي.»
د لښکرګاه ښار یو بل اوسېدونکی، منیر وايي: «دا ډېر ښه کار دی چې پوليس د جرمونو سره مبارزه کوي، موږ غواړو چې قانون ټول ځای کې په سمه توګه پلی شي.»
د هلمند امنیه قومنداني ټینګار کړی چې د جنايي جرمونو پروړاندې مبارزه دوامداره ده او د قانون ماتونکي کسانو د نیولو او د جرمونو د مخنیوي لپاره اقدامات روان دی.