غزه کې طبي سرچینې وايي چې د اسراییلي ځواکونو د پرلهپسې هوایي او توپچي بریدونو له امله لږترلږه ۷۰ فلسطینیانو خپل ژوند له لاسه ورکړی دی.
که څه هم د امریکا متحده ایالتو ولسمشر ډونالډ ټرمپ له اسراییلو غوښتنه کړې چې غزه کې باید خپل بریدونه ودروي، خو ښکاري چې دې غوښتنې ته لاهم پام نهدی شوی.
راپورونه ښيي چې د حماس ډلې د ټرمپ د ۲۰ مادو د سولې له طرحې څخه ځینې برخې منلې دي، خو بیا هم د جګړې اور نهدی مړ شوی.
د شنبې پر ورځ یوازې په لوږې او انساني ناورین اخته غزه ښار کې لږترلږه ۴۵ کسان د اسراییول بمبارۍ له امله وژل شوي دي.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
اسرایلي پوځ په تېرو اوونیو کې پر غزه ښار خپل نظامي عملیات پراخ کړي چې له امله یې شاوخوا یو میلیون اوسېدونکي اړ شوي چې د جګړې له وېرې د ښار له منځنۍ او شمالي برخې وتښتي او د غزې سویل ته چې لاهم له ګڼېګوڼې او سختو شرایطو ډک دی، پناه یوسي.
د بشري حقونو سازمانونه وایي، د غزې اوسېدونکي له شدید انساني ناورین سره مخ دي؛ نه کافي خواړه، نه درمل او نه هم د خوندي ځایونه لري. د دوی په وینا، که نړیواله ټولنه ژر اقدام ونهکړي، د ملکي تلفاتو شمېر به لا هم زیات شي.
سره له دې، د اسراییلو پوځ وایي چې خپلو «پوځي اهدافو» ته دوام ورکوي او د حماس د بشپړ لهمنځه وړلو تر وخته عملیات نه درېږي.