د ارشاد، حج او اوقاف وزارت مسوولان وايي چې سږکال د حج مراسمو کې ۲۷ افغانانو خپل ژوند له لاسه ورکړی دی.
د یاد وزارت د حج، عمرې او زیارت عمومي رییس عطاالله خادم وايي، د یادو ۲۷ افغان حاجیانو له ډلې، دوه یې، په ټرافیکي پېښو او پاتې یې، د ناروغۍ له امله مړه شوې دي.
د سلاموطندار پښتو فېسبوکپاڼه وڅارئ
د نوموړي په وینا، د یادو حاجیانو له ډلې، ۲۶ یې، سعودي عربستان کې خاورو ته سپارل شوي او یوازې یوه مېرمن افغانستان ته لېږدول شوې.
هغه وویل: «د روان کال پرمهال د حج مراسمو کې ۲۷ افغان حاجیانو د بېلابېلو علتونو له امله خپل ژوند له لاسه ورکړی دی چې ۲۷ افغانانو له ډلې یې، دوه، د ټرافیکي پېښو او پاتې یې، د امراضو له امله مړه شوې دي. یوازې یوه مېرمن چې د پکتیکا ولایت ده، افغانستان ته انتقال شوې او پاتې ۲۶ جسدونه د کورنۍ په اجازه یې، سعودي عربستان کې خاورو ته سپارل شوې دي.»
د معلوماتو له مخې، سږکال د حج مراسمو کې د نړۍ د بېلابېلو هېواونو سلګونه حاجیانو د هوا تودوخې، ګڼېګوڼې او نورو لاملونو له امله خپل ژوند له لاسه ورکړی دی.