د کابل د قرهباغ ولسوالي محلي او امنیتي مسوولان وايي چې د دوو خبریالانو جسدونه یې د قرهباغ او ستالف ولسوالیو ترمنځ پیدا کړي دي.
د دوی په وینا، د خورشید ټلوېزیون د دوو خبریالانو جسدونه د دغې ولسوالي روغتون ته لېږدول شوي دي.
د کابل د قرهباغ ولسوال خواجه حنیف صدیقي سلاموطندار ته ویلي چې د خورشید ټلوېزیون مخکینی عملیاتي رییس محمدرفېع صدیقي او د هغه یوه همکاره فهیمه ګازو نیولي او مړه شوي دي.
هغه وايي، محمدرفېع صدیقي او فهیمه د ستالف ولسوالي اړوند په یوه کور کې مړه شوي او په وینا یې، د یادو کسانون په وجود کې داسې نښې نښانې نشته چې برید دې پرې شوی وي.
د کورنیو چارو وزارت ویاند طارق ارین وايي چې د خورشید ټلوېزیون مخکینی رییس محمدرفېع صدیقي ګازو نیولی او مړ شوی دی.
محمدرفېع صدیقي تر دې وړاندې د ټاکنو خپلواک کمېسیون د رسنیو کمېټې د رییس په توګه هم کار کړی و.
امنیتي مسوولانو په دې اړه خپلې څېړنې پیل کړې دي.
