د چین په پلازمېنه «بېجېنګ» او شاوخوا سیمو کې د سختو اورښتونو له کبله ۳۳ کسان مړه شوي او د ژغورونکې ډلې د پنځو کارکوونکو په ګډون ۱۸ کسان لادرکه دي.
د وروستیو اوونیو پرمهال د چین په پلازمېنه کې د ریکارډ کچې اورښتونه شوي چې د ښار شاوخوا سیمې یې هم اغېزمنې کړې دي.
د سلاموطندار پښتو برخه دلته وڅارئ
د الجزیرې خبري شبکې د راپور پر بنسټ، د چین چارواکو نن چهارشنبه د اګسټ نهمه ویلي چې د راوتلیو سېلابونو له کبله ودانۍ نړېدلې چې پرمهال یې ۳۳ کسان مړه او ۱۸ نور لادرکه شوې دي.
د راپور له مخې، د بېجېنګ په لوېدیځه غرنۍ سیمه سېلابونو ۵۹۰۰۰ کورونه نړولي، نږدې ۱۵۰زره د هستوګنې نورې ودانیو ته زیان اوښی او ترڅنګ یې څه د پاسه «۳۷۰۰۰» جریبه کرنیزه ځمکه لهمنځه تللې ده.
د بېجېنګ د ښاروال مرستیال ژیا لېنماو یوه خبري کنفرانس ته ویلي چې ډېری سړکونه او څه باندې سل پلونه هم زیانمن شوي دي.
د یاد هېواد په نورو برخو کې هم د سختو اورښتون له کبله د سېلابونو راوتو او د ډېری خلکو د مړینې خبر ورکړل شوی دی. د جولای میاشتې له وروستیو راهیسې دغه هېواد کې پیل شویو اورښتونو د میلیونونو کسان د ژوند چارې ګډوډې کړې دي.
دا په نږدې یوه لسیزه کې پلازمېنه بېجېنګ کې د ریکارډ کچې اورښتونه او تر ټولو ناوړه طبیعي ناورین بلل شوی دی.
د چین نورې سیمې هم د دوبي سختې ګرمۍ او وچکالۍ سره مخ دي چې د یادو سیمو اوسېدونکو روغتیا او محصولات یې له ګواښ سره مخ کړي دي.