سلاموطندارنینگ کابل و مملکت ایریم ولایتلریده ۳۳ نفر یاش (۱۸ قیز و ۱۵ اوغیل) بیلن اوتکزگن صحبت نتیجهلری شونی کورستهدی کی، باشقهلر اولرنینگ حیاتیگه ارهلشووی شخصی تنلاولر، اجتماعی مناسبتلر، تعلیم و حیاتنینگ باشقه بولیملریگه سیزیلرلی تأثیر کورستگن.
اوشبو گزارشده یاشلرنینگ ایتیشیچه، باشقهلرنینگ ارهلشووی اینگ کوپ اولرنینگ کیینیش اصلوبی و تعلیم یونهلیشینی تنلشگه تأثیر قیلگن. جملهدن ۱۲ نفر یاش کیینیش توری، ۱۲ نفری اوقیشنی دوام ایتتیریش، ۴ نفری کسب تنلش، ۳ نفری اجتماعی خلق-اطوار، ینه ۲ نفری ایسه عایلهوی و اجتماعی مسئلهلر گه بو ارهلشوو تأثیر قیلگنینی بیلدیرگن.
دایکندی ولایتیدن بولگن ۲۶ یاشلی لطیف حیدری و بغلان ولایتی یشاوچیسی ۲۹ یاشلی بهشته حمید، تعلیم یونهلیشینی تنلش و اوقیشنی دوام ایتتیریش بارهسیده تورلیچه قرهشلرگه دوچ کیلگنلرینی ایتهدی.
لطیف شوندهی دییدی: «مین شخصی قیزیقیشیم اساسیده صنعت یونهلیشیگه و فلم بولیمیگه کیردیم. اوشه پیتده عایلهم اعضالری و جمعیتدهگی کوپلب آدملر بو تنلاونی قوللب-قوتلمهدی. اولر نیگه طبیات یا کی انجنیرلیک یونهلیشلرینی تنلمهگنیمنی سورهشدی. حتا بو مناسبتلر سبب بیر مدت اوقیشنی دوام ایتتیریشدن واز کیچیشنی هم اویلهدیم.»
بهشته هم بوتوغریده فکر-ملاحظهسینی شوندهی بیان قیلهدی: «عالی تعلیمنی دوام ایتتیریش اوچون چت ایلگه باریشگه قرار قیلگنیمده، کوپچیلیک بو قراریمنی معقوللمهدی. اولرنینگ فکریچه، عیال کوپراق عنعنوی روللر دایرهسیده قالیشی کیرهک.»
تعلیمدن تشقری، ایریم یاشلر اوزلرینینگ متخصصلیک تنلاوی، کسبی یولی و تورموش طرزی هم باشقهلرنینگ ارهلشووی تأثیریده قالگنینی ایتهدی.
کابل شهریده یشاوچی ۲۶ یاشلی اصلیه نقشبندی، روانشناسلیک یونهلیشینی تنلهگنی سببلی ایریم آدملرنینگ تورلیچه قرهشلری و مناسبتلریگه دوچ کیلگنینی ایتهدی. او شوندهی دییدی: «روانشناسلیک یونهلیشینی تنلهگنیم سببلی کیینیش اسلوبیم و کسبی یونهلیشیم تنقید آستیگه آلینگن. کوپچیلیک روانشناس ساحهسی افغانستانده کیلهجککه ایگه ایمسلیگینی یا کی بو یونهلیشنی تنلهگنیمدن پشیمان بولیشیمنی ایتردی. بوندهی بهالر بعضیده انسانلرنینگ اشتیاقینی کمهیتیریب، اوز مقصدلریگه نسبتن ایشانچسیز بولیب قالیشیگه سبب بولیشی ممکن.»
سرپل ولایتیدن بولگن ۲۸ یاشلی احمد جاوید، مکتبنی توگهتگچ عایلهسی یانیده قالیب، ایکینچیلیک و چارواچیلیک بیلن شغللنیشگه قرار قیلگنینی، بیراق ایریم آدملر بو تنلاونی قالاقلیک بیلگیسی دیب حسابلهگنینی ایتهدی. او شوندهی دییدی: «مکتبنی توگهتگنیمدن کیین عایلهم یانیده قالیب، ایکینچیلیک و چارواچیلیک ساحهسیده ایشلشگه قرار قیلدیم. بعضی آدملر اگر شهرگه بارگنیم یا کی دولت ایشیگه کیرگنیم یخشیراق بولردی دیب ایتیشردی. ایریملر قیشلاقده قالیشنی قالاقلیک بیلگیسی دیب اویلشهدی. حال بو کی مین اوز ایشیمدن ممنون ایدیم و عایلهم یانیده بولیش آرقهلی کوپراق فایدهلی ایکنیمنی حس قیلردیم.»
اوشبو گزارشده صحبت قیلگن ینه بیر قنچه یاشلر، کیینیش اسلوبی و خلق-اطواری سبب باشقهلرنینگ مناسبتیگه دوچ کیلگنینی ایتهدی.
کابل شهری اون بیرینچی ناحیه یشاوچیسی بولگن ۲۹ یاشلی محمد سمیع، کیینیش طرزی و خطی-حرکتلری سبب اطرافدهگیلرنینگ فکرلری و مناسبتلریگه کوپ باره دوچ کیلگنینی ایتهدی. او شوندهی دییدی: «مین هم کیینیش اسلوبیم و خُلقیم سبب بهالنمهگن من. دوستلریمدن بیری کیینیشیم اوچون دایما مینی مسخره قیلردی. حتا ایریملر نیگه دایم دریشی کییشیم یا کی پتلون کییب یوریشیمنی سورهشردی. بو حالت اوزاق وقت دوامیده مینی بیزواته قیلگن.»
یاشلر حیاتیگه باشقهلرنینگ ارهلشووی تأثیری فقط اولرنینگ تنلاولرینی اوزگرتیریش بیلن چیکلنمهیدی. بو تجربهلر اولرنینگ روحی حالتی، اوزینی قدرلشی و قرار قبول قیلیش جریانیگه هم تأثیر کورستیب، کوپ حاللرده اوزینی پست بهالش، رنجیش، استرس و روحی باسیم حسلرینی کیلتیریب چیقرگن.
دایکندی ولایتیدن بولگن ۲۸ یاشلی عبدالوهاب سروش، اطرافدهگیلر اونینگ قرهشلرینی قبول قیلمهگنی اونده روحی باسیم تاپیلیشیگه سبب بولیشینی بیلدیرهدی. او شوندهی دییدی: «مینی بهالشگنده، اوزیمنی یخشی حس قیلمهی من. عادتده قرهشلریم، فکرلریم یا کی تنلاولریم قوللب-قوتلنمهیاتگنی و توشونیلمهیاتگندیک حس قیلهمن. بو تویغو مینده رنجیش و روحی باسیم تاپیلدی.»
سرپل ولایتی یشاوچیسی ۲۵ یاشلی مریم حسینی ایسه، باشقهلرنینگ قرهشلری اونینگ اوزیگه بولگن ایشانچیگه تأثیر قیلگنی و ایریم حاللرده کیلهجگی حقیده قرار قبول قیلیشینی قیینلشتیرگنینی ایتهدی. اونینگ ایتیشیچه: «بو مسئلهلر کوپراق سلبی تأثیر قیلگن، چونکی اولر روحی باسیمنی کیلتیریب چیقرهدی و بعضیده اوزیمگه بولگن ایشانچیمنی کمهیتیرهدی.»
ایریم یاشلرنینگ ایتیشیچه، بو تجربهلر کوپراق عایله، دوستلر، تینگداشلر و اجتماعی محیط تأثیریده شکللنگن.
کابل شهری یشاوچیسی بولگن ۲۰ یاشلی تمنا و دایکندیدن بولگن ۲۳ یاشلی فرزانه فرهمند، باشقهلرنینگ ارهلشووینی کوپراق عایله، دوستلر و جمعیتدهگی آدملر تامانیدن حس قیلگنینی ایتهدی.
تمنا شوندهی دییدی: «جمعیتدهگی اینگ کوپ بهالشلر تورلی آدملر – عایله، دوستلر، قوشنیلر و جمعیتنینگ باشقه اعضالری تامانیدن عملگه آشیریلهدی. بیراق مینینگ فکریمچه، اینگ کتته باسیمنینگ اوزی جمعیت تامانیدن کیلهدی.»
فرزانه هم فکرینی شوندهی بیان قیلهدی: «مین دوچ کیلگن اینگ کوپ بهالشلر دوستلر، تینگداشلر و جمعیتدهگی آدملر تامانیدن بولگن. کوپ حاللرده کیینیش اسلوبیم، گپیریش طرزیم یا کی خُلق-اطواریم حقیده دوستلریم و اطرافدهگی انسانلر تامانیدن تنقید قیلینگن من.»
شو بیلن بیرگه، جمعیتشناسلر باشقهلرنینگ ارهلشووی یاشلرنینگ خطی-حرکتلریگه تأثیر قیلیشینی و اوزاق مدتده اولرنینگ عایلهوی، اجتماعی مناسبتلری همده کیلهجگیگه سلبی عاقبتلر آلیب کیلیشی ممکنلیگینی تأکیدلهیدی.
جمعیتشناس شعیب احمدی شوندهی دییدی: «بعضی عایلهلرده عنعنوی مدنیت و باشقهلرنینگ فکریگه حددن تشقری کتته اهمیت بیریش بار. افسوس کی، کوپلب عایلهلرده حیات عایله اعضالرینینگ حقیقی ایستکلری، قدریتلری و احتیاجلری اساسیده ایمس، بلکی باشقهلرنینگ قرهشلری و بهالری اساسیده تشکیل ایتیلهدی.»
روانشناسلرنینگ ایتیشیچه، باشقهلرنینگ ارهلشووی انساننینگ اوزیگه بولگن ایشانچی، قرار قبول قیلیشی و حیاتدن قانیقیشیگه تأثیر قیلیشی ممکن.
روانشناس امجد خان دانش شوندهی دییدی: «اگر یاشلر باشقهلرنینگ بهاسیدن حددن تشقری خواطر آلسه، استه-سیکین استرس گه، اوز قدرینی پست بهالشگه، اوزیگه بولگن ایشانچنینگ کمهیشیگه و خطا قیلیشدن قورقیشگه دوچ کیلهدی. بوندهی شرایطده قرارلر ایندی شخصی قدریتلر، قابلیتلر و قیزیقیشلر اساسیده ایمس، بلکی باشقهلرنینگ راضیلیگینی آلیش اوچون قبول قیلینه باشلهیدی.»
اوشبو گزارش نتیجهلری شونی کورستهدی کی، ایریم حاللرده یاشلر حیاتیگه باشقهلرنینگ ارهلشووی امکانیتلرنینگ چیکلنیشی، اوزیگه بولگن ایشانچنینگ کمهیشی و روحی باسیملرنینگ یوزه گه کیلیشیگه سبب بولگن. خبردارلیکنی آشیریش، ایجابی صحبتلر آلیب باریش و شخصی تنلاونی قبول قیلیش یاشلر گه اجتماعی قدریتلرنی سقلهگن حالده، اوز قابلیتلری و قیزیقیشلری اساسیده قرار قبول قیلیشگه یاردم بیریشی ممکن.
