«کاشکی اوشه امکانیتنی قولدن بای بیرمهگنیمیده ایدی»؛ بو گزارشده صحبت قیلگن ۳۱ نفر یاشنینگ سوزلریدن بیر قسمی؛ بوگون اولر اوتگن تنلاولری، قولدن بای بیریلگن امکانیتلری و عملگه آشمهی قالگن آرزولری حقیده سوز یوریتهدی. سلاموطندارنینگ توقیز ولایتده یشاوچی ۱۶ نفر قیز و ۱۵ نفر ییگیت بیلن اوتکزگن صحبت نتیجهلری شونی کورستهدی کی، تعلیم، ایش بیلن تأمینلنیش، مهاجرت و نکاح – اینگ کوپ قولدن بای بیریلگن امکانیتلر دیر. بو یوقاتیلگن امکانیتلر کوپلب یاشلر اوچون اونیتیلمس ارمانلر گه، کوپ حاللرده ایسه روحی معمالر گه هم سبب بولگن.
گزارشده صحبت قیلگنلرنینگ ۱۴ نفری اقتصادی معمالر و ایشسیزلیکنی، ۱۰ نفری تعلیم آلیش یولیدهگی توسقینلرنی، ینه ۷ نفری ایسه عایله و جمعیت باسیمینی اوزلرینینگ ارمانلری همده قولدن بای بیریلگن امکانیتلری یوزه گه کیلیشنینگ اساسی سببلری دیب بیلهدی. اوشبو یاشلر آرهسیدن ۱۴ نفری ارمانلرینی تعلیم و اوقیش بیلن باغلیق قولدن بای بیریلگن امکانیتلر گه، ۷ نفری مناسب ایش تاپه آلمهگنیگه، ینه ۱۰ نفری ایسه مهاجرت، مهاجرت قیلیش امکانینینگ یوقلیگی یا کی کیچ تورموش قوریشگه باغلهیدی.
تعلیم و ایش بیلن باشلنهدیگن ارمانلر
۲۴ یاشلی صبیحه عظیمی، «آنلاین زن» بیلیم یورتیده ژورنالیزم یونهلیشی بیتیروچیسی، حیاتیدهگی اینگ کتته ارمانی بوگونگی شرایطی و کیلهجگیگه ماس کیلمهیدیگن تعلیم یونهلیشینی تنلهگنی ایکنینی ایتهدی. اونینگ سوزلریگه کوره، اقتصادی قیینچیلیکلر سببلی قیزیقهدیگن یونهلیشنی تنلهی آلمهگن و حاضر مهم بیر امکانیتنی قولدن بای بیرگنینی حس قیلهدی. او شوندهی دییدی: «حاضرگی کونده اینگ کتته ارمانیم – توغری تعلیم یونهلیشینی تنلهی آلمهگنیم دیر. تنلهگن یونهلیشیم مین اوچون ماس ایمس ایدی. بوگونگی شرایطنی تحلیل قیلگنیمده، بوندن جوده افسوسلنهمن.»
غور ولایتیدن بولگن انجنیرلیک یونهلیشینی تماملهگن ۲۳ یاشلی محمدنعیم، حاضرده ایشسیز. اونگه کوره، اگر ینه تنلش امکانیتی بولگنیده، خارجی تیللرنی و کسبی کونیکمهلرنی اورگنیشگه کوپراق اعتبار قرهتگن بولردی. او شوندهی دییدی: «مینده بولگن ایریم تعلیم امکانیتلریدن توغری فایدهلنمهدیم. ایندی اویلب قرهسم اگر کوپراق حرکت قیلگنیمده، بوگونگی احوالیم بوندن یخشیراق بولردی. اگر ایکی ییل آلدینگه قیته آلسم، انگلیس تیلینی اورگنیشگه و کسبی کونیکمهلریمنی رواجلنتیریش اوستیده کوپراق ایشلهگن بولردیم.»
فاریابلیک ۱۸ یاشلی مدینه نوروزینینگ ایتیشیچه، عایلهوی معمالر و اقتصادی قیینچیلیکلر سببلی تیکووچیلیک کورسینی یریم یولده تشلب قویگن، حاضر ایسه بوندن افسوسلنماقده. او شوندهی دییدی: «اوشه پیتده بو کسب مینگه کیرهک بولمهیدی دیب اویلردیم. ایریم عایلهوی معمالر و قیزیقیشیم یوقلیگی سببلی تیکووچیلیک کورسیگه بارمهدیم. بیراق بوگون کورهیپمن کی، کوپلب قیزلر عینن شو هنر آرقهلی درآمد تاپماقده. شونده جوده مهم بیر امکانیتنی قولدن بای بیرگنیمنی حس قیلهمن.»
مهاجرت و ترقیات بیلن باغلیق ناتمام آرزولر
پرواندن بولگن ۲۰ یاشلی زهره قاسمی، ایکی ییل آلدین تعلیمینی دوام ایتتیریش اوچون مهاجرت قیلیشنی خواهلهگنینی، بیراق اقتصادی معمالر بونگه توسقینلیک قیلگنینی ایتهدی. او شوندهی دییدی: «طلبهلیک دوریمده انگلیس تیلینی اورگنیش اوچون کورسلردن فایدهلنه آلمهدیم. انگلیس تیلینی اورگنیشنی خواهلردیم، بیراق بونینگ علاجی بولمهدی. شونینگدیک، اوقیشنی دوام ایتتیریش اوچون چیت ایلگه کیتیشنی ایستهگندیم، لیکن عملگه آشمهدی. اقتصادی معمالر مینگه مهاجرت قیلیش امکانیتینی بیرمهدی.»
تشویش و امیدسیزلیککه آلیب کیلهدیگن ارمان
یوقاتیلگن امکانیتلردن افسوسلنیشنینگ روحی عاقبتلری هم اوشبو گزارشنینگ باشقه تاپیلمهلریدن بیری دیر. صحبت قیلگن ۲۴ نفر یوقاتیلگن امکانیتلر حقیده دایمی اویلش اولرنی روحی ناساغلاملیکلرگه دچار قیلگنینی ایتگن.
بدخشاندن بولگن ۲۲ یاشلی یسرا احمدینینگ ایتیشیچه، آنلاین تعلیم امکانیتلری موجود بولگنیگه قرهمی، او اولردن فایدهلنه آلمهگن و حاضرده پشیمانلیک همده امیدسیزلیک حسینی باشدن کیچیرماقده. اونگه کوره: «مین قتنشه آلهدیگن بیر نیچته آنلاین دستورلر بار ایدی. اما معمالر و امیدسیزلیک سببلی اولرنی بای بیریب قویدیم. بو حالت مینده استرس، امیدسیزلیک و اوزیمگه بولگن ایشانچنینگ کمهیشیگه سبب بولدی.»
فاریابدن مدینه احمدی هم، اوتمیشدهگی افسوسلر اونده اوزیگه بولگن ایشانچنینگ کمهیشیگه سبب بولگنینی ایتهدی. بیراق او بو افسوسلر اونگه کتته سباق بیرگنینی تأکیدلب، حاضرده ینگی امکانیتلرنی کوتیب آلهیاتگنینی بیلدیرهدی. او شوندهی دییدی: «بو مینگه هیچ قندهی کونیکمه و تعلیم آلیش امکانیتینی قدرسیز دیب بیلمسلیک کیرهکلیگینی اورگتدی. ایندی تیکووچیلیک بوییچه تعلیمنی ینه باشلشگه قرار قیلدیم و اوتمیشدهگی تجربهمدن فایدهلنیب، یخشیراق کیلهجک قورماقچیمن.»
یاشلر؛ جبران و کیلهجکنی قوریش امیدی
باشقه تاماندن، گزارشده صحبت قیلگنلرنینگ ایریمی تعلیم و ایش امکانیتلرینی کینگهیتیریش همده یاشلرنی قوللب-قوتلش کیلهجکده یوقاتیلگن امکانیتلرنینگ تکرارلنیشی و شونگه اوخشش افسوسلرنینگ تاپیلیشینینگ آلدینی آلیشی ممکن دیب حسابلهیدی.
۲۲ یاشلی محمدفهیم هجران، بادغیس ولایتینینگ آبکمری تومنیدن بولگن طبیات طلبهسی، شوندهی دییدی: «یاشلر اوچون ایش بیلن تأمینلنیش امکانیتلری یرهتیلیشی کیرهک. اینیقسه طلبه بولگنلر اوقیش بیلن بیرقطارده بیرار ایشنی هم دوام ایتتیره آلیشلری ممکن. طلبهلر و یاشلر هم اوقیش بیلن بیرگه ایش یرهتیش آرقهلی اوز کیلهجگینی قوریشی ممکن.»
قندوزلیک مسلمه زمان هم شوندهی دییدی: «تعلیم، ایش امکانیتلرینی یرهتیش و یاشلرنی قوللب-قوتلش یاردم بیریشی ممکن. یاشلر اوچون توصیهم شو کی، امیدلرینی یوقاتمهسینلر و هر بیر اورگنیش امکانیتیدن فایدهلنسین.»
متخصصلرنینگ اوتمیشگه افسوس بیلن یشش حقیدهگی آگاهلنتیریشی
بعضی روانشناسلر و جمعیتشناسلر اوتمیشدهگی افسوسلر سایهسیده یششنینگ شخصی و اجتماعی عاقبتلری حقیده آگاهلنتیریب، اوزاق دوام ایتگن افسوس و پشیمانلیک انسان سلامتلیگیگه ضرر ییتکزیشی ممکنلیگینی ایتهدیلر.
روانشناس زحل امیرزادهنینگ فکریچه، خواطرنینگ کوچهیشی و خاطرجمعلیکنینگ یوقالیشی یوقاتیلگن امکانیتلر حقیده اویلشنینگ عاقبتلریدن دیر. اونگه کوره: «روانشناسده بیر مسئله حقیده دایمی اویلش انسان آنگینی چرچتهدی و اونینگ خاطرجمعلیگینی بوزهدی. اگر انسان اوتمیشنی تیکلب بولمسلیگینی حس قیلسه، کوچلی امیدسیزلیک، اوزینی قدرسیز حس قیلیش و انگیزهسینینگ پسهیشی کبی حالتلر گه دوچ کیلیشی ممکن.»
جمعیتشناس عبدالسلام هاشمی هم شوندهی دییدی: «اگر بو تویغو اوزاق وقت دوام ایتسه، او شخص، جمعیت و اجتماعی فعاللیککه سلبی تأثیر کورسهتیشی ممکن. اگر یاشلر اوز خاطرهلریدن سباق آلسه، انیق مقصد گه ایگه بولسه و امید همده حرکت بیلن کیلهجک سری اینتیلسه، موفقیت گه ایریشه آلهدی. اولر افسوس بیلن یشش اورنیگه، اوتمیشدن تجربه آلیشلری کیرهک.»
ایش و اجتماعی ایشلر وزیرلیگی مسئوللرینینگ ایش امکانیتلری همده اوشبو وزیرلیکنینگ یاشلر اوچون ریجهلری حقیدهگی فکرلرینی آلیشگه حرکت قیلدیک، بیراق اوشبو گزارش ترقلگونگه قدر اولرنی آلیشنینگ امکانی بولمهدی.
اوشبو گزارشده یاشلر حکایهلری شونی کورستهدی کی، قولدن بای بیریلگن امکانیتلر و توپلنیب قالگن افسوسلر فقط اوتمیش خاطرهسی ایمس، بلکی کوپچیلیک اوچون خواطر، امیدسیزلیک و کیلهجککه بولگن امیدنینگ کمهیشیگه سبب بولگن. بو حالت شوندهی بیر پیتده یوز بیرماقده کی، جاری ییلگی خلقارا بخت شاخصی بوییچه ینگی گزارشی گه کوره، افغانستان ینه بیر بار دنیانینگ اینگ قیغولی مملکتی صفتیده قید ایتیلگن.
