سلاموطندار بیلن صحبت قیلگن ایریم یاشلرنینگ ایتیشیچه، دیجیتالی (PDF) کتابلر قولی و بیپول تاپیلیشی اولرنی، انه شوندهی کتابلردن فایدهلنیشگه اوندهگن.
اوشبو گزارشده ۱۲ ولایتدن ۲۹ نفر یاش بیلن صحبت اوتکزیلگن. اشتراکچیلرنینگ ۱۶ نفری ایرکک، ۱۳ نفری عیال بولیب، اولرنینگ یاشی ۱۸-۳۵ یاش آرهلیغده. اولر بیر ییلدن ۱۰ ییل دوامیده مطالعه اوچون دیجیتالی کتابلردن فایدهلنیب کیلماقده.
کابلده یشاوچی، اقتصاد یونهلیشینینگ ایکینچی باسقیچیده تحصیل آلهیاتگن ۲۳ یاشلی عبدالسلامنینگ ایتیشیچه، او تورت ییلدن بویان مطالعه اوچون دیجیتالی کتابلردن فایدهلنیب کیلهدی. اونینگ فکریچه، کم خرهجت، تورلی کتابلر گه آسان کیریش امکانیتی همده ایستهلگن وقت و جایده اوقیش امکانیتی بو اصولنینگ اینگ مهم افضللیکلریدن دیر. او شوندهی دییدی: «دیجیتالی کتابلردن فایدهلنیشنینگ اساسی سببلری – اولر گه آسان کیریش، ارزانلیگی، ایستهلگن جایده اوقیش امکانیتی و علمی منبعلرنی تیز تاپیش دیر. طلبه اوچون بو اصول جوده قولی. اینگ کتته افضللیگی – کتاب ایچیدن کیرهکلی معلوماتنی تیز قیدیریش، کم خرهجت قیلیش و مینگلب کتابلرنی بیتته قوریلمهده آلیب یوریش امکانیتی دیر.»
شونینگدیک، سرپل ولایتیدن بولگن ۲۰ یاشلی رنگینه، دیجیتالی کتابلر آرقهلی مطالعه قیلیش یوزمه-یوز تعلیم آلیش امکانیتی یوقلیگی طفیلی یوزه گه کیلگن ایریم معمالرنی قسماً برطرف ایتگن و اونگه اوقیشنی دوام ایتتیریش امکانینی بیرگنینی معلوم قیلهدی. او شوندهی دییدی: «تخمیناً اوچ ییلدن بیری شو یول بیلن کتاب اوقیمن. یوزمه-یوز تعلیمنی دوام ایتتیریش امکانیم بولمهگنی اوچون، دیجیتالی کتاب معلوم درجهده اونینگ اورنینی باسدی و درس همده مطالعهدن اوزاقلشیب قالمسلیگیمگه یاردم بیردی.»
اوشبو گزارش اشتراکچیلرینینگ ایتیشیچه، وقت و خرهجتنی تیجش بیلن بیر قطارده، باسمه کتابلر گه کیریش امکانیتینینگ چیکلنگنی هم اولرنینگ دیجیتالی کتابلردن فایدهلنیشگه مایل بولیشینینگ مهم سببلریدن بیری دیر.
ننگرهارده یشاوچی ۲۵ یاشلی سیدرضا ثاقبنینگ ایتیشیچه، اوزیگه کیرهکلی باسمه کتابلرنینگ کملیگی و اولرنی ساتیب آلیش خرهجتینینگ یوقاریلیگی اونی دیجیتالی کتابلردن فایدهلنیشگه اوندهگن. اونگه کوره: «مین دیجیتالی کتابلرنی افضل کورهمن، چونکی ایریم کتابلرنی بازاردن تاپیب بولمهیدی. تاپیلگن تقدیرده هم نرخی جوده قیمت بولهدی و اولر چیکلنگن نسخهده چاپ ایتیلگن بولهدی.»
بو یاشلر دیجیتالی کتابلرنی مطالعه قیلیش اوچون هوشمند تلفون، لپتاپ و تبلت کبی قوریلمهلردن فایدهلنهدیلر. صحبت قیلگنلردن ۲۹ نفر یاشنینگ ۱۶ نفری هوشمند تلفون، ۷ نفری هوشمند تلفون و لپتاپ، ۳ نفری فقط تبلت (نوتبوک)، ینه ۳ نفری ایسه تبلتدن فایدهلنیشینی بیلدیرگن.
بدخشاندن بولگن و اوچ ییلدن آرتیق وقتدن بیری دیجیتالی کتاب مطالعه قیلیب کیلهیاتگن ۲۵ یاشلی سمیه، هوشمند تلفوننینگ دایما یانیده بولیشی اونینگ کوپراق وقتینی شو قوریلمه بیلن اوتکزیشگه و کتابلرنی اساساً اونده اوقیشگه سبب بولگنینی ایتگن. او شوندهی دییدی: «دیجیتالی کتابلرنی اوقیش اوچون عادتده هوشمند تلفوندن فایدهلنه من. چونکی وقتیمنینگ کوپ قسمینی هوشمند تلفون بیلن اوتکزهمن و او دییرلی هر دایم قولیم آستیده بولهدی.»
کابلده یشاوچی، ژورنالیزم یونهلیشی بوییچه متخصص ۲۹ یاشلی روزبه فرهمندنینگ ایتیشیچه، ادبیات و رومانلرنینگ دیجیتالی نسخهلریگه آسان کیریش امکانیتی طفیلی او سکیز ییلدن بویان مطالعه اوچون پلنشیت (تبلت)دن فایدهلنیب کیلماقده. او شوندهی دییدی: «سکیز ییلدن بیری کتابلرنی دیجتالی شکلده اوقیب کیلهمن و شو پیتگچه قریب ۱۰۰ ته کتاب مطالعه قیلدیم. مین کوپراق پلنشیتدن فایدهلنه من، چونکی اونینگ ایکرن (اسکرین)کتتهراق، بطریسی اوزاق شارژ سقلهیدی و اونی آلیب یوریش هم قولهی.»
اوشبو گزارش نتیجهلری شونی کورستهدی، یاشلرنینگ اکثریتی سونگی بیر ییلدن تورت ییلگچه بولگن دور ایچیده دیجیتالی مطالعه گه اوتگن. بیراق ایریملری بیش ییلدن ۱۰ ییلگچه دیجیتالی کتاب اوقیش تجربهسیگه ایگه.
صحبت اشتراکچیلری اورتچه ۲۰ تهدن ۶۰ تگچه دیجیتالی کتاب مطالعه قیلگنینی بیلدیرگن، ایریملری ایسه اوقیگن کتابلری سانینی ۱۰۰ تهدن آشیرگن. اولرنینگ ایتیشیچه، اولر هر کونی اورتچه ۳۰ دقیقهدن ایکی ساعت گچه وقتنی دیجیتالی کتاب مطالعهسیگه اجرهتهدی.
جوزجاندن بولگن ۳۰ یاشلی قمرالدین، قریب ۱۰ ییلدن بیری دیجیتالی کتاب مطالعهسینی کوندهلیک حیاتینینگ بیر قسمی گه ایلنتیرگنینی ایتهدی. او شوندهی دییدی: «۱۳۹۴ ییلدن بویان دیجیتالی کتابلر اوقیب کیلهمن. شو وقت ایچیده یوزدن آرتیق کتابنی شو یول بیلن مطالعه قیلدیم. بیلیم یورتده اوقیگن پیتیمده هم، اوندن کیین هم – خصوصاً گزارش یازیش و آنلاین ژورنالیزم ساحهسیده کوپلب کتابلرنی دیجیتالی شکلده اوقیدیم. هر ۲۴ ساعت ایچیده کمیده بیر ساعت مطالعه قیلیشگه حرکت قیلهمن.»
دیجیتالی کتاب مطالعهسی اوقوو منبعلریگه آسان کیریش امکانینی یرهتیشی بیلن بیرگه، ساغلیق بیلن باغلیق معمالر و تخنیک قیینچیلیکلرنی هم کیلتیریب چیقرگن.
صحبت قیلگن ۲۹ نفر یاشنینگ ۲۷ نفری کوزنینگ چرچشی و باش آغریقدن شکایت قیلگن. اولرنینگ ۱۷ نفری برق یوقلیگی همده هوشمند تلفون شارژ سقلهمسلیک قیینچلیکلرنی اوشبو اصولنینگ اساسی معمالری صفتیده تیلگه آلگن. ینه ۷ نفری اینترنت تیزلیگینینگ پستلیگی و کتابلرنی یوکلب آلیشدهگی قیینچلیکلرنی معما دیب حسابلهگن بولسه، قالگن ۵ نفری ایسه کیرهکلی کتابلرنینگ دیجیتالی فایلی یا کی نسخهسی موجود ایمسلیگینی دیجیتالی مطالعهنینگ اساسی معمالریدن بیری صفتیده کورستگن.
سمنگانده یشاوچی ۱۸ یاشلی مهران طاهری و هراتدن بولگن ۲۴ یاشلی استوری مایار، بیر ییلدن آرتیق وقت دوامیده دیجیتالی کتاب اوقیب کیلهیاتگنلرینی ایتیب، بو اصولدن دایمی فایدهلنیش اولرده کوز چرچشی و باش آغریغیگه سبب بولگنینی بیلدیرگن.
مهران شوندهی دییدی: «اگر اوزاق وقت تنفسسیز اوقیسم، کوزلریم چرچهیدی و بعضاً باشیم هم آغریدی. شو سببلی هر بیر نیچه ساعتدن کیین قیسقه تنفس قیلیشگه حرکت قیلهمن.»
استوری مایار هم فکرینی شوندهی بیان قیلهدی.: «بیر مدت آلدین الکترونیکی کتابلرنی اوقیردیم. اونینگ ضررلی تامانلریدن بیری شونده کی، بو کوریش قابلیتینینگ سوسهیشیگه و باشیم آغریشگه سبب بولدی.»
ایریم تعلیم ساحهسی متخصصلری، تکنالوژینینگ کینگهیشی و دیجیتالی کتابلردن فایدهلنیش آرتیب بارهیاتگنیگه قرهمی، بو مطالعه اصولی اوز افضللیکلری بیلن بیرگه ایریم قیینچیلیکلرنی هم کیلتیریب چیقریشینی ایتهدیلر. اولرنینگ فکریچه، ایکرن آرقهلی اوقیش ایریم حاللرده دقتنی جمعلش و مطالعه صفتی گه تأثیر قیلیشی، شونینگدیک، باسمه کتابلر گه بولگن قیزیقیشنینگ کمهیشیگه سبب بولیشی ممکن.
تعلیم ساحهسی بیلرمانی جمالالدین سلیمانی شوندهی دییدی: «بوگونگی دنیاده دیجیتالی ساحه بیلن باغلیق یشهیپمیز، دیجیتالی دنیا بازار گه کیریب کیلگن و اوندن فایدهلنیشگه مجبورمیز. اما اونینگ افضللیکلری بیلن بیرقطارده کمچیلیکلری هم بار. جملهدن، کتابنی انیق و توغری اوقیش قیینلشهدی همده فکرنی جمعلشگه خلَقت بیرهدی. دیجیتالی کتابلر یخشی واسطه، بیراق او آدملرنینگ قیمتلی کتابلردن واز کیچیب، اولرنی اوقیمسلیگیگه سبب بولماقده. دیجیتالی کتابلر بعضاً انسان فکرینی چلغیتیشی ممکن.»
کوز شفاکارلری هم دیجیتالی قوریلمهلردن مطالعه اوچون فایدهلنیشنینگ آرتیب بارهیاتگنی، اینیقسه اولردن اوزاق وقت دوامیده و ساغلیق قاعدهلریگه رعایه قیلمهگن حالده فایدهلنیش، کوز سلامتلیگیگه خوف توغدریشی ممکنلیگی حقیده آگاهلنتیریشهدی.
کوز شفاکاری نیلوفر نوابینینگ ایتیشیچه، هوشمند تلفون و باشقه دیجیتالی قوریلمهلردن مطالعه اوچون اوزاق مدت فایدهلنیش کوز موشکلریگه توشهدیگن باسیمنی آشیرهدی و کوز قوریشی، خیره کوریش همده وقتینچهلیک کوریش پسهیشی کبی معمالر یوزه گه کیلیش احتمالینی کوپهیتیرهدی. اونگه کوره: «هوشمند تلفون آرقهلی اوزاق وقت دوامیده اوقیش کوزنینگ چرچشی، کوز قوریشی، خیره کوریش، وقتینچهلیک کوریش پسهیشی و آخر-عاقبت باش آغریغیگه سبب بولهدی. انسان موبایل تلفون یا کی کمپیوتردن اوزاق وقت فایدهلنگنده، کوز موشکلری چرچهیدی و قوریدی. اوشبو قوریلمهلردن چیقهدیگن کوک نور هم سلبی تأثیر کورستهدی. شو سببلی کوزده قوریش حالتی تاپیلهدی و آدم تلفوندن بیر نیچه ساعت مطالعه قیلسه، اونده وقتینچهلیک کوریش ضعیفلیگی یوزه گه کیلیشی ممکن.»
کوز جراحی مرتضا احمدی، ایکرن بیلن کوز آرهسیدهگی مصافهنی توغری سقلشگه اعتبار قرهتیب، یاروغلیکنی سازلش و کوزلر گه منتظم دم بیریش دیجیتالی قوریلمهلردن اوزاق مدت فایدهلنیش نتیجهسیده یوزه گه کیلهدیگن ضررلرنینگ آلدینی آلیشدهگی اینگ مهم اصوللردن ایکنینی ایتهدی. او شوندهی دییدی: «ایکرننینگ جایلشووی مهم؛ او کوزیمیزدن تخمیناً ۵۰-۷۰ سانتیمتر اوزاقلیکده بولیشی و بیرآز کوز درجهسیدن پستراق جایلشیشی کیرهک، شونده فایدهلنیش قولیراق بولهدی. یاروغلیکنی هم جوده بلند یا کی جوده پست قیلمسلیک کیرهک، عکس حالده کوز بیزاوته بولیشی ممکن. شونینگدیک، ۳-۲۰ قاعدهسینی اونوتمسلیک کیرهک؛ هر ۲۰ دقیقهده ۲۰ ثانیه دوامیده تخمیناً آلتی متر اوزاقلیکده قرهب، کوزلر گه دم بیریش لازم. اینیقسه کمپیوتر بیلن ایشلهیدیگنلر کوپراق پلک قاقیشگه حرکت قیلیشی کیرهک، بو کوز قوریشینینگ آلدینی آلهدی. اگر معما یوزه گه کیلسه، شفاکار گه مراجعت قیلیش و صنعی کوز یاشی تامچیلریدن فایدهلنیش توصیه ایتیلهدی.»
افغانستان اسلام امیرلیگی اخبارات و مدنیت وزیرلیگی معلوماتلریگه کوره، مملکتنینگ تورلی حدودلریده ۱۰۰ دن آرتیق عامهوی کتابخانه تشکیل ایتیلگن.
اخبارات و مدنیت وزیرلیگینینگ عامهوی کتابخانهلر باشلیغی رفیعالله صمیم، بو حقده شوندهی دییدی: «عامهوی کتابخانه – بو مدنی موسسه بولیب، شهرلر و تومنلرده کتابخانهلر تشکیل ایتیش آرقهلی جمعیتده کتاب اوقیش مدنیتینی رواجلنتیریشگه حرکت قیلهدی. اوشبو کتابخانهلرنی تشکیل ایتیشدن مقصد – طلبهلر، اوقیتووچیلر، دینی علمالر و باشقه بیلیملی انسانلر اوچون مطالعه قیلیش امکانیتلرینی یرهتیش همده اولرنینگ علمی و مدنی منبعلردن فایدهلنیشینی تأمینلش دیر. حاضرگی وقتده مملکت بویلب عامهوی کتابخانهلر فعالیت یوریتماقده و افغانستاننینگ تورلی حدودلریده جمعی ۱۰۹ ته کتابخانه تشکیل ایتیلگن بولیب، اولر فقرالر گه کتابخانه خذمتلرینی تقدیم ایتهدی.»
شو بیلن بیرگه، سویسنینگ مصافه تعلیم عملی فنلری بیلیم یورتی و برن بیلیم یورتی تدقیقاتچیلری تامانیدن اعلان قیلینگن علمی ایزلنیشلر تحلیلی شونی کورستهدی کی، الکترونیکی سیاح (E-INK) تکنالوژیگه ایگه ایکرنلر قاغاز گه کوپراق اوخششلیگی و یاروغلیکنی بیواسطه ترقهتیش اورنیگه اطراف-محیط نورینی عکس ایتتیریشی سببلی، دیجیتالی کتابلرنی اوزاق وقت اوقیشده کوپراق قولیلیک حسینی بیرهدی. اولر LCD ایکرنلری و هوشمند تلفونلر گه نسبتن کوز چرچشی بیلن کمراق باغلیق ایکنی قید ایتیلگن.
