ارمنستاننینگ سابق جمهور باشلیغی رابرت کوچاریان قولگه آلینیب و فساد گه قرشی کورهش کمیته گه آلیب باریلگن.
خلقارا ییتکرمهلرنینگ معلوماتیگه کوره، کوچاریان بوگون (۳ سنبله/۲۵ آگست، سهشنبه) ایرتهلب حقوق-ترتیبات ادارهلری خادملری تامانیدن قولگه آلینگن همده اونینگ اوییده مخالف ارمنستان حزبی وکیلی بولگن اوغلی اوییده تینتو اوتکزیلگن.
تیرگاو حرکتلری ینه بیر نیچه اونلب منزللرده بولیب اوتگن. اداره ضرور حاللرده قوشیمچه معلوماتلرنی آشکار قیلیشگه وعده بیرگن. سابق جمهور باشلیغ ادارهسی یوز بیرهیاتگن واقعهلرنی «حاکمیتنینگ کوچاریان و اونینگ عایلهسیگه نوبتدهگی هجومی» دیب اتهگن.
بیر کون اول، لوون کوچاریان و باش وزیر نیکول پاشینیان پارلمانده بیر-بیرلرینی عیبلهگن. کیچیک کوچاریان حکومت رهبرینی «آرتساخنی هلاک قیلگن و مینگلب آدملرنینگ اولیمیگه سبب بولگن پستکش و خاین» دیب اتهگن. پاشینیان ایسه جواباً کوچاریانلر عایلهسی نیمهنینگ حسابیدن میلیونر بولگنینی سورهگن و اونینگ اعضالرینی جوابگرلیککه تارتیشگه وعده بیرگن.
شونینگدیک، بوندن ایلگری ارمنستان مرکزی سیلاو کمیتهسی کوچاریاننی جنایی جوابگرلیککه تارتیشگه راضیلیک بیرگن. اونینگ وکیلی آرام اوربلیاننینگ سوزلریگه کوره، سابق جمهور باشلیغ گه منصب و وکالتلرینی سوءاستعمال قیلیش و پول یوویش عیبلاوی قوییلیشی ریجهلشتیریلگن. تیرگاو ایشنی ۲۰۰۴ ییلده «مستر کلاس» تنیس کلوبی ییر میدانی بیلن باغلیق بیتیمگه باغلهگن. ۲۰۰۸ ییلده سابق جمهور باشلیغنینگ اوغلی سدرک کوچاریان اوشبو بیتیمده اشتراک ایتگن کمپنیهنینگ اولوشینی ساتیب آلگن.
فساد گه قرشی کورهشیش کمیتهسی، ۲۵ آگستدهگی تینتولر عینن اوشبو ایش بیلن باغلیقمی-یوق می، حاضرچه انیقلیک کیریتمهگن.
