اوتگن “یکشنبه” کون وال‌استریت ژورنال کونده‌لیگی تامانیدن نشر ایتیلگن گزارش گه کوره، سونگی سیاسی تحولات و افغانستان نظامی نابود ایتیلگنیدن سونگ، اوشبو مملکت نینگ سابق حربی‌لری و استخبارات ایشلاوچیلریدن بیرقطاری داعش گروهی‌گه قوشیلگن. وال‌استریت ژورنال تامانیدن نشر ایتیلگن گزارشده ایتیلیشیچه، سابق حکومت حربی‌لری اقتصادی قیین‌چیلیک بیلن روپه‌ره بولگنلری سبب، داعش گروهی‌گه قوشیلگن.
گزارش‌گه کوره، سابق حکومت حربی‌لری و استخباراتی ایشلاوچیلری معلومات توپله‌ش و اوروش تخنیک‌لری توغریسیده داعش گروهی‌نی کوچلی قیله‌دیلر.
وال‌استریت ژورنال گه کوره، پکتیا مرکزی گردیز شهریده فعالیت قیله‌دیگن ملی اردو بیر رسمی‌سی، سابق دولت سقوط قیلگنیدن سونگ، داعش گروهی نینگ خراسان بولیمی‌گه قوشیلگن و اوتگن هفته اسلامی امارت کوچلری بیلن صورت تاپگن آتیشمه‌ده هلاک ایتیلگن.
عین‌حالده، اسلامی امارت رسمی‌لری نینگ ایتیش‌لریچه، افغانستانده داعش جدی تهدید ایمس و بو مملکتده کوچلی و حربی قرارگاهی یوق دیر.
ایتیلیشیچه، مملکتده اسلامی امارت حاکم بولگنیدن سونگ، داعش گروهی نینگ خراسان شاخه‌سی کابل، قندوز و قندهار ده کمیده اوچ هجوم اویوشتیرگن و نتیجه‌ده کوپ‌قطار تینچ اهالی هلاک و یره‌لنگنلر.
