بادغیس ولایتی بویچه ساغلیق‌نی سقلش اداره‌سی باشلیغی عبداللطیف روستایی نینگ سلام‌وطندارگه ایتیشیچه، اوشبو رقم تینچ اهالی سونگی هفته‌ده بو ولایت مرکزی قلعه‌نو شهریده امنیتی کوچلر و طالبان آره‌سیده یوز بیرگن آتیشمه‌ده هلاک و یره‌لنگنلر.
جناب روستایی گه کوره، بوتون هلاک ایتیلگن‌لر ایرکک دیر و یرهلنگنلردن ۹ ته‌سی عیال و باشقه ۷ ته‌سی باله دیر.
بادغیس ولایتی بوییچه ساغلیق‌نی سقلش اداره‌سی باشلیغی نینگ کوپه‌یتیریشیچه، یرهلنگنلردن بیرقطاری نینگ ساغلیک وضعیت‌لری خواطرلنترووچی بولگنی سبب، درمان‌لنیش اوچون هرات حوزه‌یی کسلخانه‌سیگه انتقال بیریلگن.
جناب روستایی‌گه کوره، امنیتی کوچلر قربان‌لیکلری قلعه‌نو ولایتی کسلخانه‌سی انتقال بیریلمه‌گن و حاضرگه‌قدر اولردن بیللی رقم قولگه یوق.
عین‌حالده، بادغیس حاکمی حسام‌الدین شمس نینگ سلام‌وطندارگه ایتیشیچه، سونگی بیر هفته جریانیده طالبان گروهی ۵ مرته قلعه‌نو شهری نینگ بیرقطار بولیم‌لریده گروهی شکلده هجوم قیلگن، لیکن امنیتی و دفاعی کوچلر تامانیدن کیینگه اوریلگن.
بادغیس حاکمی نینگ کوپه‌یتیریشیچه، طالبان نینگ هجومی سبب، تینچ اهالی تلفات و مالی زیان کورگن.
شونینگدیک، بادغیس ولایتی کینگش باشلیغی عبدالعزیز بیک نینگ ایتیشیچه، سونگی کونلرده یوز بیرگن آتیشمه‌لر نتیجه‌سیده اوشبو ولایت مرکزی نینگ بیرقطار یشاوچی‌لری بوتون دارایی‌لرینی قولدن بیرگنلر. اونینگ کوپه‌یتیریشیچه، آتیشمه‌لر کوپه‌یگنی سبب، کمیده ۲۰ مینگ عایله قلعه‌نو شهری نینگ اطرافی و قوشنی ولایت‌لرگه آواره بولگن.
ایتیلیشیچه، اوتگن کونی بادغیس قوم بویوک‌لری نینگ دخالتی سبب، اوشبو ولایتده امنیتی کوچلر و طالبان جنگریلری آتیش‌کیسین اعلان قیلگن.
