افغانستان ترک‌لری نینگ بیردم‌لیک کونیده، مملکت ترک‌تبارلریدن بیرقطاری نینگ اوشبو قوم‌گه قرشی عدالت‌سیزلیک بولگنیدن تنقید قیلیب ایتیش‌لریچه، اولر دستلبکی حق‌لریدن محروم قالگنلر. اولرنینگ ایتیش‌لریچه، افغانستان ترک‌لری ساغلیک خذمت‌لر، تعلیم کوریش و باشقه حق‌لردن محروم قالگن و دولت بوتوغریده دقت قیلمه‌گن.
افغانستان ترک‌لری نینگ بیردم‌لیک کینگشی باشلیغی عظیم خنجانی نینگ ایتیشیچه، سیاسی اونملی مسله‌لرده اولرگه سهم بیریلمه‌گن و تینچلیک جریانیده هم حضور تاپمه‌گنلر. جناب خنجانی نینگ کوپه‌یتیریشیچه، دولت ده هم اوشبو قوم نینگ حضوری نظرگه آلینمه‌گن.
افغانستان ترک‌لری بیردم‌لیک کینگشی نینگ عیال‌لر بولیمی مسوولی محبوبه بیگم نینگ اوشبو برنامه‌ده ایتیشیچه، افغانستان ترک‌تبار عیال‌لرینی کوچلی قیلیش اوچون سعی و حرکت صورت تاپمه‌گن و اولر حاضرده هم چیت‌گه قالگنلر. خانم بیگم نینگ کوپه‌یتیریشیچه، افغانستان ترک‌تبارلری هردایم جمهوریت نظامی دن حمایت قیلگن، لیکن اولر اوچون دولت تامانیدن هیچ‌قنده‍‌ی ایش قیلینمه‌گن.
عین‌حالده، سرحدات و قبایل وزیرلیگی اورین باسری یعقوب احمدزی نینگ ایتیشیچه، ترک‌لر افغانستان نینگ بویوک قوم‌لریدن دیر و مملکت اونملی موضوع‌لریگه سهیم بولیش اوچون هردایم سعی و حرکت‌لر صورت تاپگن.
