بعضی قیزلر اوز بیلیملرینی اویده سینگیللری و ایناغهلری بیلن بولیشیب، وقتلرینینگ بیر قسمینی اولر گه تعلیم بیریشگه اجرهتگن. سلاموطندارنینگ مملکت سکیز ولایتیده ۲۱ نفر قیز بیلن اوتکزگن صحبتلری شونی کورستهدی کی، بیلیملرینی سقلب قالیش، اوقیشنی دوام ایتتیریش و عایله اعضالریگه یاردم بیریش بو قیزلرنینگ اویده تعلیم بیریشدهگی اساسی سببلردن دیر.
بو قیزلرنینگ یاشی ۱۷ دن ۲۶ یاشگچه بولیب، اولردن ۱۳ نفری طلبه، ۸ نفری ایسه اوقووچی دیر. اولر سینگیللری و ایناغهلریگه تعلیم بیریشده مکتب درسلیکلری، مکتب و بیلیم یورت دوریدهگی نوتلریدن، ضرورت توغیلگنده ایسه اینترنتده بولگن منبعلردن فایدهلنهدیلر.
نسرین صادقی، ۲۶ یاشده بولیب، جوزجان بیلیم یورتینینگ اقتصادیات یونهلیشیده تحصیل آلگن. او اوز بیلیملرینی سینگیللریگه ییتکزیش مقصدیده اولر گه تعلیم بیرهیاتگنینی ایتهدی. او شوندهی دییدی: «اوقیشیمنی دوام ایتتیره آلمهگنیمدن سونگ، اویده سینگیللریمگه درس بیرهمن. شو آرقهلی اوزیم اورگنگن نرسهلرنی اولر گه ییتکزیشگه حرکت قیلهمن.»
دایکندی یشاوچیسی بولگن ۱۷ یاشلی خدیجه همتی، او ۸-صنف اوقووچیسی بولگن و ایکی ییلدن بیری سینگیلیسی و ایناغهسیگه انگلیس تیلیدن درس بیرهیاتگنینی ایتهدی. اونگه کوره: «ایکی ییلدن آشدی، اویده ایکی سینگلیم و بیر ایناغهم گه هر کونی ساعت ۸:۰۰ دن کیین بیر-ایکی ساعت انگلیس تیلیدن درس بیرهمن.»
جوزجاندن بولگن انیلا نوری، بیلیملرینی سقلب قالیش بیلن بیرگه سینگیللریگه و باشقه بالهلر گه هم اویده تعلیم بیرهدی. او وقتنی توغری صرفلش و بالهلر گه یاردم بیریش، درس بیریشدهگی اساسی مقصد ایکنینی ایتهدی. او شوندهی دییدی:«سینگیللریم و جیینلریمگه شونینگدیک قوشنیمیزنینگ بیر نیچه اوغیللریگه، تاغهم و ابهمنینگ فرزندلریگه دری، ریاضی و قرآنکریم درس بیرهمن. اولر گه تعلیم بیریش اویده وقتیمنینگ بیهوده اوتیب کیتمسلیگیگه یاردم بیرهدی.»
مژده انوری، ۲۲ یاشده بولیب، کابل پولیتخنیک بیلیم یورتیده انجنیرلیک یونهلیشیده تحصیل آلگن. او تعلیم آلیشدن توختهگنیدن سونگ، سینگیللری و ایناغهلریگه درس بیریشگه قرار قیلگنینی ایتهدی. او شوندهی دییدی: «تورلی فنلردن درس بیرهمن. چونکی تورلی ییللرده تورت، بیش، آلتینچی صنفلرده ساینس، کمپیوتر، انگلیس و اجتماعی فنلردن درس بیرگنمیز. حاضر هم شو فنلرنینگ برچهسیدن درس بیرهمن.»
واجده سادات ۳۲ یاشده بولیب، کابل بیلیم یورتینینگ اجتماعی فنلر یونهلیشینی تماملهگن. او بدخشان ولایتی جرم تومنیدن بولیب، هر کونی ایکی ساعتدن کوپراق وقتینی سینگیللری و ایناغهلریگه درس بیریشگه اجرهتیشینی بیلدیرهدی. او شوندهی دییدی: «اویده تعلیم بیریشنی باشلهگنیمده بو مین اوچون هم جوده فایدهلی بولدی، هر کونی ایکی یا کی ایکی یریم ساعتدن کوپراق وقت اجرهتهمیز، بیرگه ایشلهیمیز و درس قیلهمیز.»
نورستان ولایتی یشاوچیسی بولگن ۲۲ یاشلی زرمینه، اوی یوموشلری و دهقانچیلیک ایشلری بیلن بیر قطارده، اوچ ییلدن بیری سینگیللری و ایناغهلریگه تعلیم بیریب کیلهیاتگنینی معلوم قیلهدی. او تعلیم بیریشگه قیزیقیشی بولسه-ده، درسلیکلرینینگ ییتیشمسلیگی و انترنتدن فایدهلنیش امکانینینگ یوقلیگی درس بیریش جریانیدهگی اساسی معمالردن ایکنینی تأکیدلهیدی. او شوندهی دییدی: «کوپراق اوی یوموشلری و دهقانچیلیک ایشلریده عایلهمگه یاردم بیرهمن. بوندن تشقری، قریب اوچ ییلدن بیری سینگیللریم و ایناغهلریمگه درس بیرهمن. اینگ کتته معمالریم کتابلرنینگ کملیگی، انترنتنینگ یوقلیگی و اوی یوموشلری بیلن باغلیق مسئولیتلر دیر.»
شیبا کریمی، ۲۶ یاشلی، بدخشاننینگ فیضآباد شهریدن بولگن ژورنالیست یونهلیشی بیتتیروچیسی، امکانیتلرنینگ چیکلنگنی و درس بیریش اوچون مناسب جاینینگ یوقلیگینی اویده تعلیم بیریش دهگی باشقه معمالر صفتیده قید ایتهدی. اونینگ ایتیشیچه: «امکانیتلرنینگ کملیگی، روحی باسیم و مناسب جاینینگ یوقلیگی اساسی معمالر ایدی. شونگه قرهمی، بو وضعیت مینده مسئولیت حسینی ینهده کوچهیتیردی. چونکی اگر مین یاردم بیرمسم، سینگیللریم و ایناغهلریم تعلیمدن ینهده اوزاقلشیب کیتیشلرینی حس قیلردیم.»
شو بیلن بیرگه، متخصصلر تعلیم و اوقیشدن قالگن قیزلرنینگ اویده سینگیللری و ایناغهلریگه مکتب فنلریدن درس بیریشینی ایجابی تشبث دیب حسابلهیدی. اولرنینگ فکریچه، بو عایلهلرده تعلیم آلیش جریانینینگ دوام ایتیشیگه یاردم بیریشی ممکن.
تعلیم و تربیه بوییچه متخصص جمالالدین سلیمانی شوندهی دییدی: «تعلیم و اوقیشدن قالگن قیزلرنینگ اویده بالهلر گه تعلیم بیریش مسئولیتینی اوز زمهسیگه آلیشی، مینینگ فکریمچه یخشی. چونکی اولر کوپراق حرکت قیلیب، سینگیللری و ایناغهلرینینگ تعلیم-تربیهسیگه یخشیراق یاردم بیرهدیلر.»
شو بیلن بیرگه، روانشناسلر هم قیزلرنینگ سینگیللری و ایناغهلریگه تعلیم بیریشینی ایجابی تشبث دیب بهالهیدی. چونکی بو اولرده اوقیشگه بولگن قیزیقیشنی سقلب قالیش، اوزیگه بولگن ایشانچنی مستحکملش و اوزلرینی فایدهلی حس قیلیشلریگه یاردم بیریشی ممکن.
روانشناس زحل امیرزاده شوندهی دییدی: «اولا عایلهسیگه یاردم بیرهیاتگنیدن و اورگنگنلرینی باشقهلر گه ییتکزه آلهیاتگنیدن فخرلنیش حسی اونینگ اوزیگه بولگن ایشانچینی ینهده مستحکملهیدی. شونینگدیک عایلهلر بو قیزلر گه حسی جهتدن قوللب-قوتلش کورسهتیشی کیرهک. چونکی اولر اوز قدر-قیمتی فقط قیلهیاتگن ایشیگه، آلگن درجهسیگه یا کی اوقیگن تعلیمی گه باغلیق ایمسلیگینی بلکی اوزلری هم قدرلیگینی بیلیشلری کیرهک.»
باشقه تاماندن، جمعیتشناس شعیب احمدی، قیزلرنینگ سینگیللری و ایناغهلریگه تعلیم بیریشینی ایجابی بهالب، بو جریان عایلهلرده تعلیم و اورگنیشگه بولگن روحیتنی کوچهیتیریشینی ایتهدی. او شوندهی دییدی: «تعلیم و اوقیشدن قالگن قیزلرنینگ سینگیللری و ایناغهلریگه تعلیم بیریش مسئولیتینی اوز زمهلریگه آلگنی جوده ایجابی حالت. بو عایلهلرده تعلیمنینگ دوام ایتیشیگه، یعنی عایلهلرده تعلیم آلیش روحیتینینگ سقلنیب قالیشیگه خذمت قیلهدی. عایلهلر مهم رول اوینهگنی اوچون اولر گه امکانیت یرهتیشی، قوللب-قوتلشی، رغبتلنتیریشی و قیزلرنینگ اوقیشنی ینهده دوام ایتتیریشی اوچون قولی شرایط یرهتیشیگه حرکت قیلیشی کیرهک.»
اوشبو گزارش نتیجهلریگه کوره، قیزلر اوزلریدهگی قیزیقیشنی سقلب قالیش و موجود امکانیتلردن ثمرهلی فایدهلنیش مقصدیده وقتلرینینگ بیر قسمینی سینگیللری و ایناغهلری همده باشقه بالهلر گه تعلیم بیریشگه اجرهتگن. بو قیزلر اوز بیلیملرینی باشقهلر گه ییتکزیش آرقهلی نهفقط بالهلرنینگ تعلیم آلیشی و رواجلنیشیگه حصه قوشماقده، بلکی اوزلرینینگ تعلیم آلیش گه بولگن قیزیقیشینی هم سقلب قالیشگه اینتیلماقده.
