غزنی ولایتیده ایکینچیلیک محصولاتلرینینگ ییغیم-تیریم فصلی کیلیشی بیلن، اوشبو ولایتدهگی ایریم باغدارلر و میوه سوداگرلری، محصولاتلری اوچون بازار یوقلیگیدن شکایت قیلیشهدی.
غزنیده میوه و سبزهوات محلی تجارلر، آلمه، اوزوم، آلو، شفتالو و ناک کبی تورلی خیل میوهلرنی ییتی کیلولیک پلاستیکی پاکتلرده ییرلشتیرگن و هر کونی ارزان نرخده شهر تورلی سرکلریده لیلام قیلهدیلر.
غزنی ولایتیده میوه محلی سوداگرلریدن بولگن غلام محبوب، کوپینچه محصولاتنینگ قیمتی اوتگن ییل گه نسبتن سیزیلرلی درجهده کمهیگنینی ایتهدی. او شوندهی دییدی: «جاپانی آلمه فصلی دیر؛ اوتگن ییلی هر کیلو ۱۴۰ دن ۱۵۰ افغانی ساتیلردی، بیراق بو ییل قیمتی ۶۰، ۷۰ و ۸۰ افغانی گه ییتگن.»
غزنیده باغدار و سوداگرلردن بولگن محمدانورنینگ ایتیشیچه، محصولاتنی پرورش قیلیش اوچون ییللر ایشلش و مصروفیتدن سونگ، ایندی میوهلرنی ارزان نرخده ساتیش گه مجبور دیر. اونگه کوره: «یوللر توسیلگن و محصولات او تامان [چیگره) گه تشیلمهیدی. بیز محصولنی باغده ۱۰۰ روپیه ساتیب آلهمیز، بو ییرگه آلیب کیلگنده حتا اوشه ۱۰۰ روپیه هم ساته آلمهیمیز. دولتدن یوللرنی آچیب و یشاوچیلر گه ایش و قولیلیک یرهتیشنی ایستهیمیز.»
شو بیلن بیرگه، غزنی ولایتی زراعت ریاستی مسئوللری، پاکستان بیلن چیگرهنینگ یاپیق ایکنی اوشبو وضعیتنینگ یوزه گه کیلیشی گه سبب بولگنینی ایتهدیلر. اولرنینگ ایتیشیچه، معمانی حل قیلیش اوچون ساووتکیچ امبارلرینی قوریب و مقابل ترانزیت یوللرینی تاپیش گه سعی-حرکت قیلماقدهلر.
غزنی ایکینچیلیک ریاستینینگ مطبوعات مسئولی محمد ذکریا هوتک شوندهی دییدی: «بوندن ایلگری باغ و سبزهوات محصولاتلریمیز پاکستان گه صادر قیلینردی و بو یونهلیش غزنی ولایتی محصولاتلرینی تشیش اوچون اینگ مهم یوللردن ایدی. افسوس بیلن یوللر یاپیلگنیدن کیین باغدارلر و سوداگرلر کوپینچه قیینچیلیک بیلن دوچ بولگن. زراعت ریاستی خصوصی سکتور همکارلیگیده دهقانلرنینگ محصولاتلری اوچون مقابل یول تاپیش گه سعی-حرکت قیلماقده.»
باشقه تاماندن، غزنی ولایتی سودا و سرمایه کیریتیش اتاقلری باشلیغی عبدالمتین قلندرینینگ ایتیشیچه، اوشبو اداره ایرانلیک سرمایه کیریتوچیلرنی غزنیده ایکینچیلیک ساحهسیگه سرمایه کیریتیش و زراعتی فارملرینی تشکیل ایتیشگه ترغیب ایتگن.
فغانستان اهالیسینینگ یریمیدن کوپی ایکینچیلیک و باغدارچیلیک بیلن شغللنهدی. اولر اساسی احتیاجلرینی محصولاتلرینی ساتیش بیلن تأمینلهیدی. بازار یوقلیگی بیواسطه اولرنینگ حیاتی گه سلبی تأثیر قوییشی ممکن.
