بوگون (یکشنبه ۸- حمل) افغانستان انسان حقلری ایرکین کمیسیونی «افغانستان ده ناگران کیشیلرنینگ انسانی حقلری وضعیتی» توغریسیده ینگی تحقیقی گزارشی نی نشر قیلدی. مذکور گزارش نینگ کورستیشیچه، اوتگن ۱۴ ییل ده ناگران کیشیلرنینگ سانی کوپه‌یگن.
انسان حقلری کمیسیونی نینگ اوشبو گزارشی اساسیده، بو پیتده اوروش، ناتینچلیک و ماین پارتله‌شی باعث ناگران کیشیلرنینگ سانی ۱۱ فایز کوپه‌یگن. مذکور تحقیق ده ۲۲ ولایتده بیر مینگ و ۵۰۴ کیشی بیلن مصاحبه قیلینگن کیم اولردن بیر مینگ و ۱۹۲ ته‌سی ایرکک و باشقه ۳۱۰ ته‌سی ایسه عیال ایکن.
انسان حقلری ایرکین کمسیونی نینگ گزارشی گه کوره، مملکت نفوسی‌دن ۱۳.۹ فایزی نی (۴ میلیون و ۴۷۵ مینگ و ۸۰۰ کیشی) ناگرانلر تشکیل بیره‌دی. بو کمیسیون نینگ ایتیشیچه، اوتگن ۱۴ ییل ده ناگران کیشیلرنینگ سانی ۱۱.۲ فایز کوپه‌یگن.
انسان حقلری ایرکین کمیسیونی، اوروش، ماین پارتله‌شی، ترافیکی حادثه‌لر، اوز باشیمچه‌لیک دارو دن قولله‌نیش، واکسین تطبیق قیلمه‌سلیک و حامله‌لیک وقتی ده عیاللرگه ییترلیچه توجه قیلمه‌سلیک نی ناگرانلر سانی کوپه‌یشی نینگ اصلی دلیل‌لری دیگن.
بو کمیسیون نینگ گزارشی اساسیده، مذکور کیشیلر حقارت قیلینیش، آزارلنتیریش، اجتماع و اوی ده فیزیکی زوروانلیک، عایله اعضالری نینگ حمایتی دن محروم بولیش و کیتیب-کیلیش قیینچلیکلری بیلن روپه‌رو دیر.
انسان حقلری ایرکین کمیسیونی نینگ کوپه‌یتیریشیچه، ناگران کیشیلر مذکور قیینچلیکلرگه علاوه، حاضر هم اوقیش حقلری گه قول تاپیش اوچون کتته توسیق‌لرگه روپه‌رو دیر. گزارش گه ایتیلیشیچه، کوز و قولاق ناگرانلریگه اوقیش اوچون کتته قیینچلیکلر موجود.
بو کمیسیون نینگ معلوماتی اساسیده، ناگران کیشیلرگه ساغلیک خدمتلر ترقه‌تیش پروسه‌سی حاضر هم رضایت بخش ایمس دیر و ناگران کیشیلرنینگ ایش حقی گه قول تاپیشی قیینچلیکلر و چیکلاولر بیلن دوچ کیلگن.
انسان حقلری ایرکین کمیسیونی ناگران کیشیلرگه امکانیت یره‌تیش اوچون دولت نینگ کم‌کارلیگی دن تنقید قیلیب ایتیشیچه، حکومت ناگران کیشیلرنینگ دولتی و غیر دولتی ساختارلرده ناگران کیشیلرنینگ ایش گه آلیش اوچون بیرگن وعده‌لری توغریسیده ییترلیچه ایش قیله آلمه‌گن.
