«اوچینچی کوز» نامی آستیده تورت کونلیک رساملیک کورگزمهسی، ایریم صنعتکارلر و صنعت گه قیزیقهدیگنلرنینگ اشتراکی بیلن، بوگون (۳ ثور/۲۳ اپریل، پنجشنبه) کابل غربی قسمیده آچیلدی.
کورگزمه تشکیلاتچیلرینینگ ایتیشلریچه، بو کورگزمهده مملکت صنعتکارلرینینگ ۸۰ ته اثری کورسهتوگه قوییلگن.
اولر، صنعتکارلر اثرلرینی کوریش امکانینی یرهتیش همده جمعیتده صنعتنی قوللب-قوتلش مدنیتینی مستحکملش مقصدیده اوشبو کورگزمه اوتکزیلگنینی ایتهدیلر.
اوشبو کورگزمه تشکیلاتچیلریدن محمدحسین جوادی شوندهی دییدی: «صنعت بولیمیده ایشلهیمیز، صنعت مسابقهلری اوتکزیلسین و اثرلریمیز کورسهتوگه قوییلسین، آدملر کیلیب کورسینلر و ساتیب آلسینلر همده صنعتکارلرنی قوللب-قوتلهسینلر. بو کورگزمه استادلر و صنعتکارلر اثرلرنی نقد قیلیش اوچون یخشی امکانیت دیر.»
کورگزمه تشکیلاتچیلری، بوندهی تدبیرلر صنعتکارلر و تماشابینلر اورتهسیده اوز ارا علاقهنی یولگه قوییشگه امکان یرهتیشی همده صنعت رواجیگه سبب بولیشینی ایتهدیلر.
شو بیلن بیرگه، اوشبو کورگزمهده اثری کورسهتوگه قوییلگن رسامچیلردن علینا افضلینینگ ایتیشیچه، بو کورگزمهده اشتراک ایتیش اونگه اوز ایچکی آوازی و استعدادینی باشقهلر بیلن شریک قیلیش همده یاشلرنی الهاملنتیریش اوچون امکانیت یرهتگن. اونینگ ایتیشیچه: «دییرلی اوچ ییلدن بیری رساملیک قیلهمن. بو کورگزمهده آوازیم، استعدادیم و صنعتیمنی باشقهلر گه کورسهتیش و یاشلرنی صنعت گه ترغیب قیلیش اوچون اشتراک ایتدیم. مین نهفقط خورسند من، بلکی حیات اوچون قیته امید تاپگنیمنی حس قیلهمن.»
باشقه تاماندن، رسامچیلیک ساحهسیده بیش ییلدن بیریب فعالیت یوریتیب کیلهیاتگن حجتالله صمدی، اثرلرینی کورسهتیش اوچون بو کبی کورگزمهلر اوتکزیلیشینی مهم دیب ایتیشیچه، صنعت آرقهلی حیات قیینچیلیکلریدن بیرآز اوزاقلشهی آلهدی. او شوندهی دییدی: «قریب بیش ییلدن بیری رساملیک قیلیب کیلهیپمن. رساملیک قیلیشده یخشی حس تاپیلهدی. رساملیک قیلیش پیتیده باشقه دنیاده بولهسیز، او پیتده حیات قیینچیلیکلری ایسدن چیقهدی.»
اشتراک ایتگنلر اوشبو کورگزمهنی، صنعت بیلن باغلنیش و صنعتکارلرنینگ حس-تویغولرینی چقورراق انگلش اوچون قیمتلی امکانیت دیب بیلیشهدی.
اولرنینگ ایتیشیچه، بوندهی کورگزمهلر جمعیتنینگ صنعت گه بولگن قرهشینی اوزگرتیریشی و صنعتکارلرنی ترغیب قیلیش و انگیزه بیریشی ممکن.
اوشبو تورت کونلیک کورگزمه یکشنبه گچه دوام ایتهدی، اونینگ اوچ کونی عیاللر و سونگی کونی ایسه ایرکک اشتراکچیلر گه اختصاص بیریلگن.
