اسلام امیرلیگی ایکینچیلیک، سووغاریش و چاروهچیلیک وزیرلیگی آرقهلی بوگون (۲-ثور، چهارشنبه)، کابل بادام باغده، «زمانهوی ایکینچیلیک و چاروهچیلیک، مملکت آزیق-آوقت خوفسیزلیگی و اقتصادی رواجلنیشیگه امکانیت یرهتووچی» شعاری بیلن، دهقان بیرهمی همده ایکینچیلیک و چاروهچیلیک محصوللرنینگ ۳۴-کورگزمهسی آچیلدی.
تورت کونلیک مذکور کورگزمهده، ایکینچیلیک و چاروهچیلیک محصوللری همده عیاللر قول صناعتی ۲۶۳ غرفهده نمایش گه قوییلیب و بو غرفهلردن ۵۶ تهسی عیاللرگه اختصاص بیریلگن.
اسلام امیرلیگی ایکینچیلیک، سووغاریش و چاروهچیلیک وزیری عطاءالله عمری، کورگزمهنینگ آچیلیش مراسمیده، ایکینچیلیک و چاروهچیلیک بولیمینینگ میکانیزه بولیشیگه تاکیدلب و ایتیشیچه، افغانستان بیر قطار بولیمده خودکفالیککه ییتیشیب و برچه بولیمده خودکفالیککه ایریشیش اوچون سعیوحرکتنینگ دوامی بار. «بو ییل افغانستان آزیق-آوقت محصوللرینینگ مستقللیک ییلی دیر؛ بیر ییلدن بیری باشقه مملکتلردن وارداتیمیز یوق و ایچکی محصوللر اولرنینگ اورنینی آلگن. کیلهسی بیر-ایکی ییلده آزیق-آوقت محصوللریده خودکفالیککه ایریشیب و باشقه مملکتلرگه صادراتنی باشلهیمیز. بو ییل مملکتیمیزنینگ خصوصی سکتوری رواجلنیشی ییلی دیر. ایکینچیلیک وزیرلیگی برچه بار امکانیتی بیلن بیزلر و بازار اوچون پاک و صفتلی آزیق-آوقت محصوللرینی تولید قیلیشگه حرکت قیلهدی.»
ایکینچیلیک، سووغاریش و چاروهچیلیک وزیرلیگی مسئوللری، اوشبو کورگزمهنینگ یولگه قوییلگنیدن مقصد، اقتصاد، زراعت و چاروهچیلیک بولیملری رواجلنیشی همده ایچکی تولیدلر و محصوللرنینگ قوللب-قوتلنیشی عنوان قیلگنلر.
شوندهی بیرحالده، بو کورگزمهده حضوری بولگن دهقانلردن قطاری، محصوللری ساتیلیشی اوچون بازارلر کوچهیشی و ستندرد ساووقخانهلر قوریلیشینی سورهگنلر. مذکور دهقانلردن بیری محمداسلمنینگ ایتیشیچه: «بیزلر ایشلهیمیز و فایدهنی باشقه آلهدی. بو توغریده اسلام امیرلیگینینگ اقدام قیلیشی کیرهک. اوزوم، آلمه و باشقه محصوللریمیز اوچون ساووقخانه قورسین و مملکتدن تشقی گه صادراتیمیزدن حمایت بولسین.»
اوشبو کورگزمه گه شرکت قیلگنلر، ایکینچیلیک و چاروهچیلیک محصوللرنینگ ۳۴-کورگزمهسینی، محصوللری تانیشتیریلیشی و ساتیلیشی اوچون بیر امکانیت دیگنلر. تخار ولایتیدن بولمیش و بو کورگزمهده غرفه آلگن عیاللردن نازنیننینگ ایتیشیچه: «قتیق، ماست، پنیر، قروت، مسکه و چلاو شامل لبناتنی نمایش گه قویگنمین. اهالی گه ایچکی محصوللر تانیشتیریلیشی اوچون محصوللریمیزنینگ نمایش گه قوییلشینی ایستهیمن.»
کابل دن بولمیش و غرفهدار عیاللردن باشقه بیری عایشه، یشاوچیلرنینگ کورگزمه گه باریب و ایچکی محصوللردن کوریب چیقیشلرینی سورهیدی. «تورلیخیل محصوللریمیز بار. اوی دیزانلنیشیدن باشلب، گلدان و تقینچاققه قدر. هر قنچه کوریب چیقهدیگن کوپ بولسه، اوشنچه ساتیش هم کوپهیهدی. اولکهداشلریمیزنینگ کیلیب و محصوللرنینگ کوریشلرینی ایستهیمیز.»
شوندهی بیرحالده، کوریب چیققنلردن قطاری بو کبی کورگزمهلر اوتکزیلیشیدن خورسندلیک قیلیب و اهالیدن اوشبو کورگزمه گه باریشلری و ایچکی محصوللردن ساتیب آلیشلرینی سورهگنلر. مذکور کورگزمهدن کوریب چیققنلردن لیلینینگ ایتیشیچه: «کوریب چیقننلر سانی آز دیر. یشاوچیلر کیلیب و مملکتیمیزده ایشلب چیقریلهدیگن محصوللرنی کورسینلر و آلسینلر که اولکهداشلریمیز تشویق بولسین.»
شونینگدیک کورگزمه گه بارگنلردن لینا، اوشبو کورگزمهده تورلیخیل نرسهلرنینگ نمایش گه قوییلگنینی بیان قیلیب و ایتیشیچه: «ماشاءالله کوپینچه یخشی یخشی محصوللر و نرسهلرنی نمایش گه قوییبتیلر. یشاوچیلردن کورگزمه گه کیلیب، عیاللرنینگ تشویق بولیشلری مقصد، نرسهلردن ساتیب آلیشلرینی ایستهیمن.»
ایتیش کیرهک که، ایکینچیلیک و چاروهچیلیک محصوللر، پروسس بولگن تولیدلر، عیاللر قول صناعتی، ایکینچیلیک ماشینلر، زعفران، سووغاریش جهازلری، میوهلی و میوهسیز کوچتلر و قویاش تولید قیلووچی دستگاهلر، بو کورگزمهده نمایش گه قوییلگن اینگ مهم نرسهلردن دیر.
