انسان حقوقیدن مدافعه‌چیلیک قیله‌دیگن ملی و خلق ارا نهادلر گزارشی‌گه کوره، اوتگن بیر ییل جریانیده انسان حقوقی مدافعهچیلری و مدنی فعاللردن ۲۳ ته‌سی هلاک ایتیلگن.
افغانستان مدنی جماعه‌چیلیک مجتمع‌سی و افغانستان بوییچه انسان حقوقیدن مدافعه‌چیلیک کمیته مسووللری نینگ کابلده خبر بیر ییغین اوتکزیب ایتیشیچه، اوتگن بیر ییل جریانیده انسان حقوقی مدافعهچیلری و مدنی فعاللردن ۲۳ ته‌سی هلاک ایتیلگن.
افغانستان مدنی جماعه‌چیلیک مجتمع‌سی نینگ اجرایی باشلیغی عزیز رفیعی نینگ ایتیشیچه، مذکور انسان حقوقی مدافعهچیلری و مدنی فعاللر مملکت ناتینچ ولایت‌لریده دولت‌گه قرشی گروه‌لر تامانیدن اولدیریلگنلر.
اونینگ ایتیشیچه، انسان حقوقی مدافعهچیلری جدی تهدیدلر بیلن روپه‌ره بولگن.
افغانستان بوییچه انسان حقوقی مدافعه‌چیلیک کمیته‌سی، حکومتدن انسان حقوقی مدافعه‌چی‌لریگه قرشی بولگن تهدیدلر و قتل دوسیه‌لرینی جدی صورتده تیکشیریشی‌نی سوره‌گن.
عین‌حالده، جمهورلیک ریاستی ایکینچی اورین باسری سرور دانش نینگ اوشبو ییغینده حضور تاپیب ایتیشیچه، حاضرده هیچ‌بیر کیشی دولت‌گه قرشی گروه‌لر تامانیدن تینچ ایمس و افغانستان دشمن‌لری دموکراسی، قانون حاکمیتی، ایرکین‌سوز و انسان حقوقی نی هدف آستیگه قرار بیره‌دی.
دانش نینگ کوپه‌یتیریشیچه، دشمن ۲۰ ییل‌لیک ارزش‌لر و یوتوق‌لرنی هدف آستیگه قرار بیریش اوچون سعی و حرکت قیله‌دی و بونده‌ی حرکت‌لر بیلن حکومت و اهالی آره‌سیده فاصله ایجاد قیلیشی‌نی ایسته‌یدی
ایتیلیشیچه، بوندن آلدین انسان حقوقی مدافعه‌چیلیک کمیسیونی انسان حقوقیدن حفاظت قیلیش اوچون جمهور رییس غنی تامانیدن ایجاد ایتیلدی و انسان حقوقی مدافعه‌چیلریدن حفاظت قیلیش اوشبو کمیسیون نینگ اساسی ایش‌لریدن بولگنی ایتیلگن.
