افغانستان خبرچی‌لری نینگ مرکزی و بوتون دنیا ده رسانه و سوز ایرکین‌لیگیدن مدافعه قیله‌دیگن ۴۰ تشکیلات، بیرلشگن ملتلر تشکیلاتی نینگ خوفسیزلیک کینگشی گه بیر نامه یوباریش بیلن افغانستان ده خبرچیلرنینگ اولدیریلیشی دن خواطر بیلدیریب و بو توغریده مذکور تشکیلات آرقه‌لی تیزلیککه اقدام قیلینیشی نی سوره‌شگن.
رسانه‌لر و سوز ایرکین‌لیگیدن مدافعه قیله‌دیگن نهادلرنینگ آگاه‌لنتیریشیچه، بو وضعیت نینگ دوامی افغانستان سوز ایرکین‌لیگی و شونینگدیک دموکراسی گه ضرر ییتیشتیره‌دی. افغانستان خبرچیلر مرکزی تامانیدن تیارلنگن اوشبو نامه‌ده کیلیشیچه، آمریکا و طالبان گروهی آره‌سیده تینچلیک کیلیشوونامه‌سی امضالنگنیدن بویان، امنیتی وضعیت یمان بولیب و افغانستان ده ۱۱ خبرچی و رسانه ایشلاوچیسی هلاک ایتیلگن.
شونینگدیک بوگون کابل ده افغانستان عیال خبرچی‌لریدن حمایت قیلووچی مرکز، خبری بیر ییغین اوتکزیب ایتیشیچه، امنیتی تهدیدلر میزانی یوقاری کیتیشی و خبرچیلرنینگ اولدیریلیشی عیاللرنینگ خبرچیلیگی نی قیین‌لشتیرگن.
افغانستان عیالر خبرچی‌لریدن حمایت قیلووچی مرکز مسئولی فریده نیکزاد، بو مملکتده خبرچیلیک وضعیت قیین‌لشگنیدن خواطر بیلدیریب ایتیشیچه، حکومت و امنیتی نهادلر خبرچیلر اولدیریلیشی نینگ آلدینی آلمه‌گن صورتده، رسانه و سوز ایرکین‌لیگی نینگ سیسی اوچیش احتمالی بار.
خانم نیکزاد نینگ ایتیشیچه، دولت نینگ حمایت قیلمه‌یشی گه علاوه، شونینگدیک رسانه‌لردن حمایت قیلووچی اداره‌لر هم وضعیت یخشی‌لنیشی اوچون هیچ بیر ایش قیلمه‌گن.
رسانه‌لر و سوز ایرکین‌لیگیدن مدافعه قیله‌دیگن نهادلر بیرلشگن ملتلر تشکیلاتی نینگ خوفسیزلیک کینگشی‌دن، بو تشکیلات افغانستان خبرچی‌لری نینگ سقله‌نیشی توغریسیده‌گی سعی و حرکت‌لرینی کوپه‌یتیریشی و افغانستان حکومتی نینگ یاردمی بیلن خبرچی‌لرگه قرشی جرم گه چلینگن کیشیلرنینگ معاف ایتیلمه‌یشی خصوصیده جدی اقدام قیلیشینی سوره‌شگن.
