سونگی ایکی آی جریانیده مملکت بیرقطار ولایت‌لریده امنیتی کوچلر و طالبان جنگریلری آره‌سیده شدت‌لی آتیشمه‌لر یوز بیرگن. محلی منبع‌لرنینگ ایتیش‌لریچه، طالبان جنگریلری بیرقطار منطقه‌لرنی تصرف قیلگنلر.
ایکی آی جریانیده طالبان گروهی نینگ فاریاب، تخار، بغلان، قندوز، سمنگان، پکتیا، هرات، بلخ، هلمند، نیمروز و پروان ولایت‌لریده‌گی هجوم‌لری شدت‌لنگن و نتیجه‌ده کوپ‌قطار تومن‌لر طالبان نظارتی‌گه اوتگن.
سونگی پیت‌لرده بیرقطار منبع‌لر کاپیسا ولایتی نینگ تگاب تومنی‌نی طالبان قولیگه سقوط قیلگنیدن خبر بیرگن‌لر. کاپیسا امنیتی منبع‌لری نینگ ایتیش‌لریچه، طالبان قولیگه سقوط قیلگن تومن‌لرنی اوشبو گروه وجودیدن تازه‌لش اوچون حربی عملیات‌نی دوامی بار.
عین‌حالده، هرات حاکمی سوزلاوچیسی جیلانی فرهاد نینگ ایتیشیچه، طالبان جنگریلری اوتگن کیچه اوشبو ولایت نینگ بیرقطار تومن‌لریده هجوم قیلگن و طالبان جنگریلری مسکونی اوی‌لرگه جایلشگنلر.
هرات حاکمی سوزلاوچیسی‌گه کوره: «بوگون دشمن بیر مسجدگه جایلشگن ایدی و امنیتی کوچلرنی هجوم آستیگه قرار بیره‌ریدی. امنیتی کوچلر و کوماندولر معلومات قولگه کیلتیرگنیدن سونگ، محلگه بارگن، لیکن طالبان جنگریلری مسجد و مسکونی اوی‌لرگه جایلشگنی سبب، عملیات دقت بیلن ایلگری کیتماقده.»
عین‌حالده، ۲۱۷ پامیر قول اردو قومندانی عباس توکلی نینگ ایتیشیچه، امنیتی کوچلر طالبان گه قرشی حربی عملیات یولگه قوییش اوچون تیارگرلیک آلماقده.
قولگه توشگن معلومات‌لرگه کوره، سونگی ایکی آی جریانیده ۱۰۰ دن آرتیق تومن طالبان قولیگه سقوط قیلگن و ملی مدافعه وزیرلیگی کمیده ۲۰ تومنی‌نی طالبان وجودیدن تازلنگنیدن خبر بیرگن.
