کنر ولایتی یشاوچیسی و تورت بالهنینگ آنهسی بولگن ۳۳ یاشر سادیهگه کوره، قریب تورت ییل آلدین اوز اوییده گل ایکیشگه باشلهگن. اونینگ ایتیشیچه، باشده بیر قطار قیینچیلیکلر بیلن روپهره بولگن؛ لیکن سعیوحرکت بیلن بو ایشده موفق بوله آلهگن. اونینگ کوپهیتیریشیچه، عیاللر اویده ایشلب و بیران نرسه تولید قیلیشلری ممکن که، هم قیشلاقلر همده شهرلرده کوپینچه مشتریسی بار.
اونینگ ایشانچیگه کوره، اوشبو ایش بیر تاماندن اویین-کولگی و باشقه بیر تاماندن ایسه، عایله اقتصادی وضعیتی یخشیلنیشیده مهم اورینگه ایگه دیر. سادیهنینگ کوپهیتیریشیچه: «باشده قورقیدیم؛ چونکه تجربهم یوق ایدی؛ لیکن باشده ایککنیم گللر چیققنیده، جودهیم خوش بولدیم. اوشه پیتده بیلدیم که مین هم فایدهلی بیر ایشنی بجره آلهمن.»
سادیه، گل ییتیشتیریش ایشینی، آز ییر؛ بیراق یخشی درآمدی بولگنی اوچون تنلهگن. اونینگ ایتیشیچه، گللر یالغیز تجارتی بیر توار ایمس، بلکیم اهالی یورهکلریگه هم خوشلیک کیلتیرهدی. سادیهنینگ ایش کونی ایرتهلب باشلنهدی. او باشده اوی ایشلرینی قیلیب و کیین باغچهسیگه کیتهدی. او ییرده گللرگه قرهیدی، اولرگه سوو بیرهدی، قوریگن برگلرنی اَییرهدی و توپراقدن مراقبت قیلهدی.
او، کوندهلیک ایشی توغریسیده سلاموطندار گه شوندهی دیدی: «سوونینگ ناحق کیتمسلیگی اوچون تلاش قیلهمن. ایرتنگ و شام سووغارهمن و توپراقنینگ حاصل بیرهدیگن بولیشی اوچون طبیعی کودلردن فایدهلنهمن.» اونگه کوره، قیزیل گلنی ییتیشتیریش اوچون کوپ زحمت تارتیش کیرهک؛ چونکه اونینگ مخصوص قرهش گه نیازی بار.
اونینگ سعیوحرکتلری نتیجه بیرگن؛ تازه گللرینی بازار گه آلیب بارگنیده، کوپینچه مشتری تاپیب و اونینگ درآمدی بیلن عایله اقتصادی نیازلرینینگ بیر قسمینی تامین قیله آلگن. «گللریمنی ساتگنیمده، اونینگ پولی بیلن بالهلریمنینگ اوقیش خرهجتینی تامین قیلدیم. بو مینی اوچون کته بیر فخر ایدی.»
سادیه، ایش باشیده، اوروغ کملیگی، بازار بیلن تانیش ایمسلیک و اهالینینگ سلبی قرهشلری کبی قیینچیلیکلر بیلن روپهره ایکن؛ لیکن بو قیینچیلیکلر بولگنی بیلن، سعیوحرکتدن قول تارتمهی و ایشیگه دوام بیرگن. اونینگ کوپهیتیریشیچه، حاضر نهفقط او موفق بولگن، بلکیم باشقه نیچه عیالنی هم اویلری و باغچهلریگه گل ایکیشلری اوچون تشویق قیلگن.
سادیه، کیلهجک اوچون بیر قطار برنامهلری بولیب و گل ایکیش ایشینی کوچهیتیرماقچین. «عیاللردن برچهسیگه امیدسیز بولمهینگ دیهمن. کیچیک ایشلردن باشلهینگ و اوزلرینگیزگه ایشانینگ دیهمن. هر بیر عیال تغییر یرهته آلهدی.»
سادیهنینگ حکایهسی، باشقه عیاللرگه هم بیللی بیر پیامی بار: اراده، تلاش و ایشانچ بولگنی صورتده، حتا کیچیک بیر باغچهدن هم بویوک تغییرنی یرهتیش ممکن.
