«مین اوقیشنی، موفقیت گه ایریشیشنی و مقصدلریمگه ییتیشنی خواهلهیمن. قبول قیلگن قراریمدن ممنون من و بختیارمن.» بو سوزلر کابلده یشاوچی ۳۰ یاشلی شفیقهنینگ فکری دیر. ژورنالیزم یونهلیشینی تماملهگن شفیقه نکاحدن آلدین تعلیمی و کسبی مقصدلریگه ایریشیشنی خواهلشینی بیلدیرهدی. شفیقه بو تنلاوده یالغیز ایمس. سلاموطندارنینگ بیر گروه قیزلر بیلن اوتکزگن صحبتلری شونی کورستهدی کی، اولر اوچون تعلیمنی دوام ایتتیریش، ایشلش و شخصی مستقللیککه ایریشیش استوار اهمیت ایگه.
مذکور گزارش اوچون افغانستاننینگ سکیز ولایتیده ۲۰ نفر قیز بیلن صحبت اوتکزیلگن. اولرنینگ ۱۲ نفری تورموش قورمهگنینینگ اساسی سببی صفتیده تعلیمنی دوام ایتتیریش و کسب گه اعتبار قرهتیشنی کورستگن. قالگن سکیز نفری ایسه حلی بیرگهلیکده حیات قوریشگه ماس کیلهدیگن انساننی اوچرهتمهگنینی ایتگن.
کابللیک ۳۱ یاشلی زهرا نکاح فقطگینه مناسبت اورنهتیش ایمس، بلکی بونینگ اوچون توغری وقت هم کیرهکلیگینی تأکیدلهیدی. «مین اوقیشنی دوام ایتتیریشنی، یوقاری چوقیلرگه چیقیشنی و موفقیت قازانیشنی ایستهیمن. شوندن کیینگینه تورموش قوریش حقیده قرار قیلهمن. اوقیمیشلی، مستقل و آنگلی قیزلر نکاح گه شاشیلمهیدی، مین هم شوندهی من»، دییدی او.
کابللیک ۲۹ یاشلی و قابلهلیک یونهلیشی طلبهسی مرسل هم تعلیمنی دوام ایتتیریش و کیلهجکدهگی کسبی فعالیتینی قوریش اونینگ استوار مقصدی بولگنینی ایتهدی. او شوندهی دییدی: «حاضرگی استوار وظیفهم – کیلهجگیمنی قوریش و مقصدلریمگه ایریشیش. مین حلی هم اوزیمنی رواجلنیش باسقیچیده دیب بیلهمن و اوقیشنی دوام ایتتیریشیم کیرهک، کیین ایسه نکاح حقیده قرار قیلهمن.»
تعلیم و ایش فعالیتینی نکاحنی کیچیکتیریش سببی دیب بیلهدیگن قیزلردن تشقری، ایریملری ماس انساننی اوچرهتمهگنینی اساسی سبب صفتیده کورستهدی.
کابللیک ۲۹ یاشر شیما اوزی تنلهیدیگن و اونینگ ایستکلری همده شخصیتینی حرمت قیلهدیگن تورموش اورتاغینی خواهلشینی ایتهدی. اونگه کوره: «حاضرگچه ماس انسان تاپیلمهدی. مین اوزیم ایستهگن، میزانلریمگه ماس و مینی استوار دیب بیلهدیگن انساننی خواهلهیمن، شرطلر قویهدیگن ایمس.»
سرپل ولایتیدن ۲۶ یاشلی کیمیا متخصصی مروه اوتگن ییللرده ساوچیلری بولگنینی، اما اولرنینگ هیچ بیرینی عایلهوی حیات اوچون مناسب دیب بیلمهگنینی ایتهدی. او شوندهی دییدی: «بو دور ایچیده بیر نیچه ساوچیلریم بولدی، بیراق اولرنینگ هیچ بیرینی حیاتیم اوچون ماس دیب کورمهدیم. بعضیلری بیلن فکری و مدنی جهتدن ماس کیلمسدیک. شو سببلی شاشیلمسلیکه و ماس انساننی کوتیشگه قرار قیلدیم.»
گزارشده قتنشگن ۲۰ قیزدن ۱۲ نفری اوزارا توشونیش و حلاللیکنی تورموش اورتاغینی تنلشدهگی اینگ مهم میزان دیب بیلهدی. اوچ نفری دایمی و یخشی ایشگه ایگه بولیشنی اساسی شرط دیب حسابلهیدی. ینه اوچ نفری بیلیم و سوادخوانلیکنی مهم دیب بیلسه، قالگن ایکی نفری ایرککدهگی یخشی خُلق و مسئولیت حصهسینی حل قیلوچی عامل دیب کورستهدی.
صحبتلر نتیجهلری شونی کورستهدی کی، قیزلرنینگ مالیهوی مستقللیک و آنگلی قرار قبول قیلیشگه بولگن قرهشلری اوزگریشی اولرنینگ نکاح گه بولگن مناسبتیگه هم تأثیر کورستگن. گزارشده صحبت قیلگن ۲۰ قیزنینگ ۱۸ نفری بو اوزگریشنی ایجابی دیب بهالهگن.
سمنگاندن بولگن ۳۲ یاشلی و اقتصادیات یونهلیشینی بیتتیرگن کامله اوقیشنی توگهتگچ، اساساً کسبی کیلهجگینی قوریشگه اعتبار قرهتگنینی ایتهدی. او شوندهی دییدی: «مینینگ اساسی اعتباریم کسبی کیلهجگیمنی یرهتیشگه قرهتیلگن ایدی. مینیمچه، بو قرهشدهگی اوزگریش ایجابی. بوگونگی قیزلر مستقل بولیشنی و آنگلی روشده قرار قبول قیلیشنی خواهلهیدی. شو سببلی اولر نکاح گه شاشیلمهیدی.»
کابللیک ۳۲ یاشلی سنیه سیرت هم نکاح بوییچه آنگلی تنلاو قیلگنیدن ممنون ایکنینی ایتهدی و بو قرارنینگ نتیجهسی صفتیده مالیهوی مستقللیکنی کورستهدی. او شوندهی دییدی: «مین آنگلی روشده تنلاو قیلگن من و اعتباریم رواجلنیش همده تعلیمگه قرهتیلگن. نکاحنی حیاتنینگ مهم قسمی صفتیده کورهمن.»
شونگه قرهمی، گزارش اشتراکچیلرینینگ برچهسی نکاح تمایلینی رد ایتمسلیگینی و مناسب شرایط همده ماس انسان تاپیلگن تقدیرده عایله قوریش حقیده اویلشلرینی ایتگن.
کابللیک ۲۹ یاشر روینا نیکزاد شوندهی دییدی: «اگر شرایط ماس بولسه و مناسب انسان تاپیلسه، البته تورموش قوریش حقیده اویلهیمن، چونکی بو پیغامبر سنتی دیر.»
دایکندیدن بولگن ۲۶ یاشلی محدثه ایسه بوگونگی کونده تورموش اورتاغینی تنلش مسئلهسیده اولگیدن باشقچه فکرگه ایگه ایکنینی ایتهدی. اونگه کوره: «توغری و آنگلی تنلاو قیلیشگه حرکت قیلهمن. مینینگ قرهشلریم اولگیگه قرهگنده انچه ییتکولشگن. مین تینچ و موفقیتلی حیاتنی ایستهیمن.»
روانشناس زهل امیرزاده قیزلر بو دور ایچیده تعلیم آلیش، ینگی کونیکمهلرنی اورگهنیش و کسبی فعالیت بیلن شغللنیش اوچون کوپراق امکانیت تاپیشینی ایتهدی. بو ایسه اولر گه اوز احتیاجلری و کوتگنلرینی یخشیراق انگلش همده عایلهوی حیات گه تیارلنیشگه یاردم بیرهدی. او شوندهی دییدی: «نکاحنی کیچیکتیریش قیزلرنینگ شخصی مقصدلریگه ایریشیشی، کونیکمهلر آرتیریشی و اقتصادی جهتدن رواجلنیشی اوچون یخشی امکانیت بولیشی ممکن. اولر اوقیش، کسبی رواجلنیش و شخصی مقصدلریگه ایریشیش اوچون کوپراق وقت تاپهدی همده عایلهوی حیات گه یخشیراق تیارلنگن حالده کیرهدی.»
جمعیتشناس عبدالسلام هاشمی ایسه کتته یاشده قوریلگن نکاح کوپراق آنگ و تیارگرلیک بیلن عملگه آشیشینی تأکیدلهیدی. او شوندهی دییدی: «قیزلر تعلیمنی یکونلش و ایش تجربهسی آرتیریش امکانیتیگه ایگه بولهدی. نکاح قنچهلیک تیارگرلیک بیلن عملگه آشیریلسه، اونینگ مستحکملیگی و موفقیتی هم شونچهلیک یوقاری بولهدی. تعلیم و تجربه آرتیرگن قیزلر عادتده اوزلرینی و عایلهوی حیاتنی یخشیراق توشونهدی همده نکاح گه آنگلیراق قرار بیلن کیرهدی.»
دین عالمی عبدالغفار غفارزاده ایسه اسلام تعلیماتلریده نکاح اوچون انیق یاش بیلگیلنمهگنینی ایتهدی. اونینگ فکریچه، قیزلر تعلیمنی یکونلش یا کی ماس ایش تاپیش مقصدیده نکاحنی کیچیکتیریشی ممکن.
اونینگ ایتیشیچه: «اسلام و حنفی فقهده قیز تعلیمنی یکونلش یا کی مناسب ایشگه ایگه بولیش اوچون نکاحنی کیچیکتیرسه، بونگه دین توسقینلیک قیلمهیدی. بیراق بو کیچیکیش دینی، اخلاقی و اجتماعی ضررلر کیلتیریب چیقرمسلیگیگه اعتبار بیریش کیرهک.»
سلاموطندارنینگ سکیز ولایتدن ۲۰ قیز بیلن اوتکزگن صحبتلری نتیجهسی شونی کورستهدی کی، قیزلرنینگ نکاح گه بولگن قرهشلری اوزگریب، تعلیم، ایش و مالیهوی مستقللیک استوار اهمیت کسب ایتگن بولسه-ده، نکاح هنوز اولر اوچون مهم حسابلنهدی. اولرنینگ اکثریتی ماس شرایط یرهتیلسه و مناسب انسان تاپیلسه، عایله قوریش حقیده اویلشلرینی بیلدیرگن.
