د هند په کوربهتوب د روان یو ورځنیو سیالیو نړیوال جام کې د جدول دوه پیاوړې لوبډلې کوربه هند نن د سوېلي افریقا پر وړاندې لوبه کوي.
ټاکل شوې چې دغه لوبه نن یکشنبه د نومبر پنځمه د یاد هېواد د کلکتې په اېډن ګارډنز کرېکټ لوبغالي کې ترسره شي.
د سلاموطندار پښتو فېسبوکپاڼه وڅارئ
هند چې د روان نړیوال جام کوربه دی په خپل کورتوب یې تراوسه اووه لوبې کړي او ټولې یې ګټلې دي. دا لوبډله اوس د جدول په لومړي ځای کې شتون لري.
هند له کړیو اوو سیالیو څخه ۱۴ امتیازه لري چې د روان نړیوال جام نیمه پایلوبې ته له مخکې لاره پیدا کړې ده.
سوېلي افریقا چې یوازې له نیدرلنډز ماته خوړلې، خپلې پاتې ټولې لوبې یې ګټلی او د جدول دویم ځای یې خپل کړی دی.
سوېلي افریقا هم اووه سیالۍ کړي چې شپږ یې ګټلي، یوه یې بایللې او ۱۲ امتیازه لري.
سوېلي افریقا له هند سره په مخ شویو وروستیو پنځو یو ورځنیو نړیوالو لوبو کې درې ځلې دې لوبډلې ته ماته ورکړې او دوه ځلې له ماتې سره شوې ده.
د یادو سیالیو په لړ کې بېګاه پاکستان نیوزیلنډ او اسټرالیا انګلستان له مخې پورته کړ.