د خوست ولایت مقام څخه په خپره شوې خبرپاڼه کې ویل شوي چې د کلیو او پراختیا ریاست په چوکاټ کې د ګربزو او موسیخېلو ولسواليو کې د بېلابېلو پروژو چارې پيل شوي دي.
خبرپاڼه زياتوي چې يادې پروژې د افغان پرمختیایي مؤسسې(ADA) له لوري او د خوړو د نړيوال پروګرام(WFP) په مالي ملاتړ پيل شوې دي.
خبرپاڼه کې راغلي په یادو پروژو کې استنادي دیوالونه، د ګوړیو او ترينچونو کېندل، د چرګانو او فیلمرغانو د فارمونو جوړول، د ۱۵۸ کسانو لپاره د حرفوي زدهکړو مرکزونه، د املوکو باغچې جوړول او ۱۴۸ تنو بزګرانو ته د کیمیاوي سرو او اصلاح شويو تخمونو وېش شامل دي.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
خبرپاڼه کې د خوست د کلیو او پراختیا رییس مولوي عنایتالرحمن جلالي له قوله ویل شوي چې د یاد ریاست موخه د خلکو د ژوند د ښهوالي او د کلیوالو د ستونزو د حل لپاره عملي او دوامدار خدمتونه وړاندې کول دي.
د خوست يوشمېر اوسېدونکي هم يادو پروژو پيل ته خوښي څرګنده کړې ده. دوی ويلي د يادو پروژو په تطبيق سره به د دغو دوو ولسواليو د خلکو ستونزې تر يوه بريده راکمې شي.
د یادونې وړ ده چې د خوست د کلیو او پراختیا ریاست له لوري په نورو سیمو کې هم ورته ګڼې پروژې روانې دي چې نږدې راتلونکي کې به بشپړې او ګټېاخیستنې ته وسپارل شي.