د امریکا ولسمشریزو ټاکنو نوماند ډونالډ ټرمپ وايي، که نومبر کې د دغه هېواد په ولسمشریزو ټاکنو کې بریالی نهشي، نور به هېڅکله ولسمشر ته ځان نوماند نهکړي.
نوموړي له یوې رسنۍ سره په مرکه کې ویلي، دی باوري دی چې ولسمشریزو ټاکنو کې به بریالی شي.
امریکا کې شوې سروې ښايي چې ډونالډ ټرمپ او د هغه سیاله کاملا هارېس په هغو ایالتونو کې چې د ولسمشر په ټاکلو کې مهمه ونډه لري، یو شان روان دي.
ډونالډ ټرمپ له ۲۰۱۶ تر ۲۰۲۰ کاله د امریکا ولسمشر په توګه ټاکلی شوی و، خو د ۲۰۲۰کال په ولسمشریزو ټاکنو کې له خپل سیال جوبایډن وروسته پاتې شو او ادعا یې کوله چې ټاکنو کې درغلۍ شوې دي.
د امریکا پخوانی ولسمشر ډونالډ ټرمپ له دې وړاندې د اسراییلو لومړي وزیر بنیامین نتنیاهو سره په لیدنه کې ویلي و، که دی په ولسمشریزو ټاکنو کې بریالی نهشي، ښايي درېیمه نړیواله جګړه رامنځته شي.
ټرمپ دې لیدنه کې ویلي: «که موږ په ټاکنو کې بریالي شو، نو کار به ساده وي او هر څه به په چټکۍ سم شي، که بریالی نهشو، ښايي منځني ختیځ کې به لویې جګړې رامنځته او ښايي په درېیمې نړیوالې جګړې پای ته ورسېږي.»
ټرمپ دا ژمنه هم کړې، که ولسمشریزو ټاکنو کې بریالی شي، ډېر ژر به د اوکراین او روسیې جګړه او غزه کې د اسراییلو روان برید د خبرو له لارې پای ته ورسوي.