د میدانوردګ محلي مسوولان وايي چې دغه ولایت کې د ټرافیکي پېښې له امله د یوې کورنۍ درې غړي مړه شوې دي.
پېښه نن یکشنبه، وږي ۲۵مه د مرکز میدانښار اړوند په «توروتېږو» سیمه کې د یوه فېلډر او یوه باروړونکي موټر د ټکر له امله رامنځته شوې.
پېښه کې درې نور کسان ټپیان شوې هم دي.
د میدانوردګ له امنیه قومنداني څخه سلاموطندار ته په رالېږل شوې خبرپاڼه کې ویل شوي چې په دغه پېښه کې د یوې کورنۍ درې غړي مړه او درې نور ټپيان شوي دي.
په مړو شویو کې پلار، مور او یوه خور شامله ده او ټپیان د امنیتي ځواکونو له لوري ولایتي روغتون ته لیږدول شوي. د ورکړل شویو مالوماتو له مخې، د ټپيانو روغتیايي وضعیت د اندېښنې وړ ښودل شوی دی.
خبرپاڼه زیاتوي، پېښه د موټرچلوونکو د ګړندي تګ او بېاختیاطۍ له امله رامنځته شوې.
باید وویل شي چې په دې ورستیو کې د کابل-کندهار په لویه لاره د میدانوردګ په مسیر کې ټرافیکي پېښې د پام وړ زیاتې شوې دي.