د عامې روغتیا وزارت د ګوزڼ له منځه وړلو د عملیاتي مرکز مسوول عبدالقدوس بریالی وايي، د دوشنبې په ورځ به په ټول هېواد کې د ګوزڼ ضد واکسین څلورورځنی کمپاین پیل شي.
هغه وویل، په دغه څلور ورځني کمپاین کې به په ټولو ولایتونو کې ۱۱،۲ میلیونه هغه ماشومان چې عمرونه یې له پنځو کلونو څخه کم وي، واکسین شي.
د سلاموطندار پښتو فېسبوکپاڼه وڅارئ
په ورته وخت کې د ۲۰۲۴ کال د ګوزڼ ضد واکسین د پلي کېدو څلورم پړاو د یکشنبې په ورځ په هرات کې پیل شوی دی.
د هېواد په لوېديځه حوزه کې د ګوزڼ ضد واکسين د پلي کېدو عملیاتي څانګې مسوول محمداصف کبير وايي، په یاد څلورورځني کمپاين کې به د هرات په مرکز او ولسواليو کې له پنځو کلونو کمعمره ۲۵۸ زره ماشومان واکسين شي.
په همدې حال کې د هرات د والي وياند نثاراحمد الياس وايي، د دغه ولايت په مرکز او ولسواليو کې د ګوزڼ واکسين د کارکوونکو لپاره اسانتیاوې برابرې دي او دولتي چارواکي په دې برخه کې لازم اقدامات کوي.
نوموړی زیاتوي: «د هرات ولایت محلي اداره په بشپر ډول ورسره همکاره ده. څرنګه مو چې مخکې ورسره همکاري کوله، د ټولو ولسوالیو مسوولانو ته سپارښتنه شوې چې په دې برخه کې له یادو مسوولانو سره همکاري وکړي. د هرات په ګوټ ګوټ کې مسوولان دې ته تیار دي چې له دوی سره همکاري وکړي.»
بلهخوا د هرات یوشمېر اوسېدونکي له چارواکو غواړي چې د دغه ولایت په ولسوالیو، په ځانګړې توګه په لرو پرتو کلیو کې د ګوزڼ واکسین د ارزښت په اړه خلکو ته معلومات ورکړي.
د هرات اوسېدونکي فهیم او مصطفی وايي، د ګوزڼ ضد واکسین پیلېدو ته خوښ دي او دوی به لومړی خپل ماشومان واکسین کړي. دوی له نورو هېوادوالو هم غواړي چې د ګوزڼ ضد واکسین په برخه کې له اړونو کارکوونکو سره همکاري وکړي.
په هرات کې روغتيايي چارواکي وایي، تېر کال په دغه ولايت کې د ګوزڼ کومه مثبته پېښه نهده ثبت شوې.
د عامې روغتیا وزارت د ګوزڼ له منځه وړلو د عملیاتي مرکز مسوولان وايي، د روان زېږدیز کال له پیل راهیسې په ټول هېواد کې د ګوزڼ څلور مثبتې پېښې ثبت شوي چې دوه یې په کندهار او دوه نورې یې په ننګرهار او نورستان ولایتونو کې دي.