د هلمند په کجکي ولسوالي کې د ملګروملتونو د پروژوي دفتر په مالي ملاتړ د ۴۰ کیلومټره سړک او اته کیلومټره کانال د جوړېدو چارې پیل شوې.
دغه پروژې د هلمند د کلیو بیارغونې او پراختیا ریاست تر چتر لاندې د ۷۶ میلیونه افغانیو په لګښت د کجکي ولسوالي په ابغول، شیري او سفیدحصار سیمو کې پیل شوي دي.
د سلاموطندار پښتو فېسبوکپاڼه وڅارئ
د دې پروژو د پرانیستې مراسمو ته د کلیو بیارغونې او پراختیا سرپرست سرپرست محمدیونس اخندزاده، وویل، یادو پروژو کې د کجکي ولسوالي د ابغول کلي اته کیلومټره کانال، د شیري سیمې ۳۰ کیلومتره سړک او د سفیدحصارسیمې اته کیلومتره سړک شامل دی.
مولوي محمدیونس اخندزاده زیاته کړه: «موږ د خلکو اړتیاوو ته لومړیتوب ورکوو، الحمدلله، په دې برخه کې مو ډېر کار کړی، څو ورځې مخکې مو د غزني ولایت کې هم یوه ستره پروژه پراننیسته.»
نوموړي زیاته کړه چې وزارت د متوازن انکشاف لپاره ژمن دی او هڅه کوي، د امکاناتو په نظر کې نیولو سره پروژې د هېواد لیرې پرتو سیمو ته هم وغځوي.
بلخوا د سیمې اوسېدونکي د دې پروژو له پليکېدو خوښ دي. د کجکي ولسوالي اوسېدونکي د یادو پروژو د پیلېدو هرکلی کوي او غوښتنه کوي چې ورته نورې رغنیزې پروژې هم دې ولسوالي ته ځانګړې کړي.
د کجکي ولسوالي اوسېدونکی محمدقاسم: «دا لارې ډېرې خرابې وې، د خلکو موټرونه به خرابېدل، بېړني ناروغان به مو پر لاره ژوند له لاسه ورکاوه، ستونزې ډېرې وې. اوس چې دا سړک رغول کېږي، خلک به له ډېرو مشکلاتو خلاص شي.»
د کجکي ولسوالي یوه بل اوسېدونکي محمدرووف وویل: «تاسو خپله ولیدل چې دا لار څومره زیاته خرابه ده، اوس چې رغول کېږي، زموږ به ګڼې ستونزې حل شي.»
کجکي ولسوالي کې د ۷۶ میلیونه افغانیو په لګښت دغه درې رغنیزې پروژې پیل شوې، چي درې ورځې وړاندې د لښکرګاه ښاروالي هم د کندهار–هرات سړک پورې د څلور کیلومتره سړک د رغونې پروژه د ۴۰ میلیونه افغانیو په لګښت پیل کړه.