د ترکیې په اسټانبول ښار کې زرګونو کسانو د دغه هېواد د حکومت له هغې طرحې سره مخالفت څرګند کړ چې له مخې یې، سپیان لهمنځه وړي.
دغه زرګونه کسان یکشنبه، جون دویمه، د اسټانبول یني کاپي میدان کې راټول شوي وو او د کوڅه ډبو سپیو د لهمنځه وړو طرحې پر ضد یې اعتراض وکړ او له حکومت یې غوښتنه وکړه چې پر خپلې دې پرېکړې بیاکتنه وکړي.
د سلاموطندار پښتو فېسبوکپاڼه وڅارئ
د ترکیې حکومت د جوړې شوې طرحې پر بنسټ، دغه هېواد کې ټول هغه سپیان چې تر یوې میاشتې د چا لهخوا په سرپرستۍ وانهخیستل شي، عقیم او لهمنځه وړل کېږي.
ترکیه کې د رجب طیب اردوغان په مشري واکمن د عدالت او توسعه ګوند «AKP» وايي چې دغه اصلاحات د کوڅهډبو «ولګرد» سپیو د کنټرول او د خلکو د داړلو مخنیوي لپاره اړین دي.
ترکیه کې چارواکي وايي چې دغه هېواد کې څه باندې څلور میلیونه کوڅهډبي شتون لري. دغه هېواد د روغتیا نړیوال سازمان لهخوا د ناروغیو خپرېدو له ګواښ سره د مخ هېوادونو په ډله کې راوستی دی.
په ورته مهال د ترکیې حکومت له لوري د خپرو شویو معلوماتو له مخې، د تېرو پنځو کلونو پرمهال دغه هېواد د کوڅهډبیو سپیو له امله ۳۴۵۵ ټرافیکي پېښې رامنځته شوي چې پرمهال یې ۵۵کسانو خپل ژوند له لاسه ورکړی او څه باندې ۵۰۰۰ نور ټپیان شوي دي.
ترکیه کې د حیواناتو حقونو فعالان غوښتنه کوي چې حکومت باید په اغېزمنه توګه د سپیو عقیمولو او دوی ته د سرپناه برابرولو برخو کې پاملرنه وکړي.