د لوګر د ټولګټو چارو ریاست مسوولان وایي چې د دغه ولایت مرکز پلعلم ښار څخه د پکتیا تر «تېرې کوتل» پورې ۳۶ کېلومټره سړک د ترمیم چارې پيل شوې.
د دغه ولایت د ټولګټو چارو ریاست مطبوعاتي مسوول محمدرضا کریمي سلاموطندار ته وویل، دغه سړک د ټولګټو چارو وزارت په مالي لګښت په راتلوونکو درېوو میاشتو کې بیارغول کېږي.
د سلاموطندار پښتو فېسبوکپاڼه وڅارئ
کریمي زیاته کړه، یاد سړک د جمهوریت پرمهال د جګړو او سېلابونو له امله ویجاړ شوی و چې موټرچلوونکو ته یې پراخې ستونزې جوړې کړې وې.
ده همدارنګه زیاته کړه، د یاد سړک له بیارغونې او ترمیم وروسته به د پلعلم-ګردیز عمومي لارې په ترڅ کې ټرافیکي پېښې هم د پام وړ راښکته شي.
بلخوا د پلعلم-ګردیز عمومې لارې یوه موټرچلوونکي عبدالله سلاموطندار ته وویل، یاد سړک د جمهوریت پرمهال د جګړو او سېلابونو له امله ویجاړ شوی وو او د لوګر سربېره د پکتیا او خوست موټرچلوونکو او مسافرو ته یې پراخې ستونزې جوړې کړي دي.
ده وویل، که دغه سړک په معیاري توګه بیاورغول شي، د لوګر سربېره د پکتیا، پکتیکا او خوست مسافر به هم بې له ستونزو پرې تګراتګ وکړي.
د کابل-ګردیز عمومي سړک شاوخوا سل کېلومټره اوږدوالی لري او د کابل له چهاراسیاب څخه تر پل علم ښار پورې دوه لینه او له پل علم څخه تر ګردیز پورې یو لینه سړک تېر شوی ده.