د هلمند په مرکز لښکرګاه ښار کې د «ټيپبال شپنیو سیالیو اتلولي» د ازاد لوبډلې په ګټه پای ته ورسېدې.
دغه سیالي د بدني روزنې او ورزش امریت اړوند د ټېپبال کرېکټ فدراسیون د استازولۍ له لوري په مرکز لښکرګاه کي د ۲۰ لوبډلو ترمنځ درې اوونۍ وړاندې پیل شوې وې.
د سلاموطندار پښتو فېسبوکپاڼه وڅارئ
په پایلوبه کې ازاد او بېنوا لوبډلې ولوبېدې چې ازاد لوبډلې دغه لوبه کې لومړی توپوهنه وکړه او لسو اورونو کې یې، سیالې لوبډلې ته د ۱۲۰ منډو هدف ورکړ.
بېنوا لوبډلې د ټولو لوبغاړو په سوځېدو سره یوازې ۹۸ منډې وکړې او د ۲۲ منډو په توپیر یې، پایلوبه وبایلله.
د یادو سیالیو تنظیموونکو لهخوا ګټونکې لوبډلې ته یو موټرسایکل هم ورکړل شو. د مسوولانو په وینا، دغه سیالي د ځوانانو بوخت ساتلو او هڅونې په موخه جوړې شوې وې.
کرېکټ لوبه چې په دې وروستیو کې یې، مینهوال خورا زیات شوي، د هلمند سربېره په نورو ولایتونو کې یې هم لوبې کېږي او د دغه ولایت په څېر د شپې لهخوا یې، هم ټورنمنټونه جوړېږي.