ټاکل شوې د روانې اوونۍ د سهشنبې پر ورځ د امریکا نیویارک ښار کې د ملګروملتونو سازمان ۷۹مه کلنۍ غونډه جوړه شي.
د راپورونو له مخې، د ملګروملتونو دغه کلنۍ غونډه به د روانې سپټمبر میاشتې په ۲۴مه پیل او تر ۳۰مې دوام وکړي.
غزې او اوکراین کې د روانو جګړو په څېر د سترو نړیوالو ننګونو ترڅنګ به، د افغانستان مسله هم د ملګروملتونو سازمان د غړو هېوادونو د کلنۍ غونډې د بحث وړ موضوع واوسي.
د چارو یوشمېر کارپوهان تمه لري چې د ملګروملتونو سازمان دغه عمومي غونډه او د نړۍ مشرانو ترمنځ د افغانستان پر مسلې بحث وکولی د هېواد سیاسي او اقتصادي انزوا ته یوه حللاره پیدا کړي.
د نړیوالو اړیکو کارپوه اجمل زرمتي سلاموطندار ته وویل: «د ملګرو ملتونو په اسمبلۍ کې د افغانستان په اړه بحث کولی شي اقتصادي او سیاسي انزوا کمه کړي او د بشري او اقتصادي ننګونو د حل لپاره د خبرو اترو لپاره بنسټ رامنځته کړي چې افغانستان ورسره مخ دی.»
د چارو شنونکي همدارنګه ټینګار کوي چې ملګري ملتونه دامهال د افغانستان وضعیت په تړاو جامع او څرګنده تګلاره نهلري او د همدې لپاره ستونزمنه به وي چې لنډ وخت کې دې له روان وضعیته د افغانستان د وتو لپاره یوه حل لاره وړاندې شي.
د نړیوالو اړیکو کارپوه اجمل زرمتي وویل: «د افغانستان په تړاو د ملګروملتونو غړیو هېوادونو د ګډ دریځ نشتون دوامداره ستونزې جوړې کړې دي. تراوسه ملګروملتون د انساني اصولو او د دغه سازمان د منشور پر بنسټ هر اړخیز دریځ نهدی خپل کړی.»
له افغانستانه بهر، په نړیواله سطحه د ننګونو زیاتېدل او د غزې وضعیت په څېر ننګونو ته د رسېدو په برخه کې د ملګروملتونو کمزورتیا، د یوه نړیوال نظم رامنځ ته کولو لپاره د دغه سازمان د اغېزمنتوب په اړه بېباورۍ زیاتې کړې دي.
ټاکل شوې د ملګروملتونو سازمان ۷۹مه کلنۍ غونډه داسې مهال ترسره شي چې افغانستان په رسمیت پېژندل شوی حکومت نهلري او استازی یې هم یاده غونډه کې له ګډون څخه محروم دی.