د پاکستان په کراچۍ ښار کې د یوه ځانمرګي برید له امله دوه چینايي وګړي وژل شوي او یوشمېر نور ټپیان دي.
ځانمرګی برید پرون یکشنبه شپه، اکتوبر شپږمه د کراچۍ ښار نړیوال هوايي ډګر ته نږدې شوی دی.
د سلاموطندار پښتو فېسبوکپاڼه وڅارئ
په ټپیانو کې یو چینایی وګړی او امنیتي کسان شامل دي.
پاکستان کې د چین سفارت دغه برید غندلی او ویلي یې دي چې ځانمرګي برید کې د یوه شرکت کارکوونکي په نښه شوي دي.
د پاکستاني رسنیو د راپورونو له مخې، د برید مسوولیت د بلوڅ بېلتون غوښتونکې ډلې پر غاړه اخیستی او په وینا یې، ځانمرګي برید کې چینایي انجینیران او پانګهوال په نښه شوې دي.
د پاکستان بهرنیو چارو وزارت دغه برید په کلکو ټکو غندلی او دغه هېواد کې د چینايي وګړو د خوندیتوب لپاره یې، د اړینو ګامونو د اخیستلو خبره کړې.
دا لومړی ځل نهدی چې دغه هېواد کې پر چینايي وګړو ځانمرګی برید کېږي، له دې وړاندې هم د پاکستان په بېلابېلو سیمو کې چینايي وګړي په نښه شوي او درنه مرګژوبله هم وراوښتې ده.