د کندهار محلي مسوولان وايي چې د دغه ولایت په خاکرېز ولسوالي کې د یوې زړې راکېټ مرمۍ د چاودنې له کبله یو کس وژل شوی او دوه نور ټپیان شوي دي.
پېښه نن سهار د «غبرګولي لومړي نېټه» د کندهار د خاکرېز ولسوالي اړوند سرګاود کارېز سیمه کې رامنځته شوې ده.
د سلاموطندار پښتو فېسبوکپاڼه وڅارئ
د کندهار د والي ویاند حاجي عزیز سلاموطندار ته ویلي، پېښه هغه مهال رامنځته شوه چې یوه کوچي د خپلې کږدۍ د درولو لپاره په اوسپنه ټکوله.
هغه وویل: «نن سهار ۱۰:۳۰ بجې د کندهار خاکرېز ولسوالۍ سرګاود کارېز سیمه کې یوه کوچي د راکېټ پخوانۍ او زړه پیاده مرمۍ هلته نږدې قرارګاه کې پیدا کړې وه او د کږدۍ د درېدو لپاره یې د خېمې مېختبیله پرې ټکوهله چي یاده مرمۍ ورباندې چاودلې.»
د کندهار د والي ویاند په وینا، پېښه کې یو کس وژل شوی او دوه کوچني ماشومان چې عمرونه یې شپږ او درې کلونه دي، ټپیان شوي دي.
حاجي عزیز همداراز زیاتوي چې د پېښې ټپیان د میرویس حوزوي روغتون ته لېږدول شوي چې او دا مهال تر درملنې لاندې دي.
دغه پېښه داسې مهال رامنځته کېږي چې له دې وړاندې هم دغه ولایت او د هېواد په یوشمېر نورو ولایتونو کې هم له جګړو څخه د پاتیو ناچاودو توکو او ماینونو د چاودنې له کبله خلکو په ځانګړې توګه ماشومانو ته مرګژوبله اوښتې ده.